मेट्ज (एजेन्सी) – फ्रान्सेली लिग १ मा आज राती पेरिस सेन्ट जर्मन (पिएसजी) र मेट्ज भिड्दै छन् । पिएसजी चारै खेलमा जितका साथ लिगको अग्रस्थानमा रहेको छ भने अंकविहीन रहेको मेट्ज तालिकाको पुछारमा रहेको छ ।

पिएसजीले चारै खेल जित्ने क्रममा १४ गोल गरेको छ र मात्र २ गोल खाएको छ । लिगको अघिल्लो खेलमा उसले सेन्ट एटिनलाई ३-० ले हराएको थियो । अर्कोतर्फ ४ खेलमा १ गोल गर्न सकेको मेट्जले यस सिजनमा एउटा पनि खेल जितेको छैन ।

तुलनात्मक रूपमा कमजोर रहेको मेट्जमाथि पिएसजी निकै हावी हुने अनुमान गरिएको छ । पिएसजीका लागि एडिन्सन काभानी, नेयमार र किलियन बाप्पे एकसाथ पहिलो पल्ट देखा पर्ने सम्भावना छ । मोनाकोबाट लोनमा आएका बाप्पेका लागि पिएसजीको जर्सिमा यो पहिलो उपस्थिति हुने छ ।

खेलअघिको पत्रकार सम्मेलनमा पिएसजीका प्रशिक्षक उनाइ एमेरीले बाप्पे खेल्न तयार रहेका बताए । ‘फ्रान्सका लागि खेले पनि सोमबार र मङ्गलबारको प्रशिक्षणमा उनी उपस्थित थिए । उनी आफैँ पनि टोलीको हिस्सा हुन उत्साहित देखिन्छन् ।’ खेल नेपाली समयअनुसार राती १२.३० बजे सुरु हुने छ ।

अन्तर्राष्ट्रिय खेलबाट बिहिबार मात्र टोलीमा फर्केका एन्जेल डि मारिया र जाभियर पास्टोरे खेलमा सामेल हुने छैनन् । त्यसैगरी मार्को भेराट्टि भने दोस्रो खेलमा रातो कार्ड पाएकाले खेल्न प्रतिबन्धित छन् । च्याम्पियन्स लिगलाई ध्यानमा राख्दै एमेरीले टोली हेरफेर गर्ने पनि उत्तिकै सम्भावना रहेको छ ।