मेट्ज (एजेन्सी)– किलियन बाप्पेले पेरिस सेन्ट जर्मेन (पिएसजी) मा ‘डेब्यू’ मै प्रभाव जमाएका छन् । गएराती फ्रान्सेली लिग १ मा पिएसजीले मेट्जमाथि ५–१ को शानदार जित दर्ता गर्दा बाप्पे पनि गोल गर्न सफल भए ।
पिएसजीको जितमा बाप्पेबाहेक एडिन्सन काभानीले २ तथा नेयमार र लुकास माउराले गोल गरे । जितसँगै यस सिजनका पाँचै खेल जितेको पिएसजी अंकतालिकाको अग्रस्थानमा छ । यसक्रममा उसले १९ गोल गरिसकेको छ । हारसँगै सिजनको पहिलो अंकको खोजीमा रहेको मेट्ज तालिकको पुछारमा रहेको छ ।
काभानीले ३१ औं मिनेटमा पिएसजीलाई अग्रता दिलाए पनि इमानुयल रिभियरको ३७ औँ मिनेटको गोलले मेट्जलाई खेलमा फर्काएको थियो । तर टोटेनह्यामका पूर्व खेलाडी बेनोइट एसोउ-इकोटोले ५६ औँ मिनेटमा रातो कार्ड पाएपछि मेट्ज १० खेलाडीमा सिमित भएको थियो ।
त्यसको फाइद उठाउँदै बाप्पेले ५९ औं मिनेटमा पिएसजीका लागि आफ्नो पहिलो गोल पुरा गरे । त्यस लगत्तै नेयमार र काभानी गोल गरे भने खेलको अन्तिम समयतिर लुकास माउराले गोल गर्दै पिएसजीको शानदार जित सुनिश्चित गरे ।
खेलभरि राम्रो अवसर पाए पनि मेट्जले त्यसको सदुपयोग गर्न भने सकेको थिएन । गएरातिको अन्य खेलमा लिल र बोर्डोले गोलरहित बराबरी खेलेका थिए । बोर्डो तालिको तेस्रो स्थानमा उक्लेको छ भने लिल ११ औँ स्थानमा रहेको छ ।
