स्टाफोर्डसाइड (एजेन्सी)– प्रिमियर लिग म्यानचेस्टर युनाइटेडको शतप्रतिशत नतिजामा पूर्णविराम लागेको छ । गए राती इरिक म्यासिक्म चोउपो मोटिङले २ गोल गरेपछि युनाइटेड स्टोकसँग २–२ को बराबरीमा रोकिएको थियो ।

चौथो खेलमा युनाइटेडको यो पहिलो बराबरी हो । यो सिजन क्लबमा आबद्ध भएका मोटिङले ४३ औं मिनेटमा गोल गर्दै घरेलु टोलीलाई अग्रता दिलाएका थिए । मामे विराम डियोफको क्रसमा उनले गोल गरेका थिए । जारी सिजनमा युनाइटेडले खाएको त्यो नै पहिलो गोल हो ।

तर, पहिलो हाफमै मार्कुुस राफोर्डको गोलमा युनाइटेडलाई खेलमा फर्काएका थिए । कर्नरमा आएको बलमा पाउल पोग्बाले हेडर मार्फत पोस्टको दिशा दिएको बल राफोर्डलाई छुँदै गोलमा परिणत भएको थियो ।

दोस्रो हाफमा रोमुलु लुकाकुको गोलमा युनाइटेडले खेलमा अग्रता लिएको थियो । ५७ औं मिनेटमा विपक्षी गोलकिपर ज्याक बटल्यान्डले पहिलो आक्रमण त्यहि रिबाउन्डमा लुकाकुले गोल गरे । सिजनमा यो उनको चौथो गोल हो । तर युनाइटेडको अग्रता पनि लामो समय टिकेन । मोटिङले ६३ औं मिनेटमा बराबरी गोल गरे । कर्नरमा प्राप्त बललाई मोटिङले हेडमार्फत गोल गरेका थिए ।

बराबरीपछि पनि युनाइटे १० अंकका साथ शीर्षस्थानमा रहेको छ । बराबरी अंक रहेको म्यानचेस्टरसिटी गोलअन्तरमा दोस्रो स्थानमा छ । सिटीले हिजो अर्को खेलमा लिभरपुललाई ५–० ले हराएको थियो । स्टोकको ४ खेलमा ५ अंक पुगेको छ ।