ग्लासगो (एजेन्सी) – च्याम्पियन्स लिगको समूह ‘बि’को खेलमा उपाधि दाबेदार मानिएका पेरिस सेन्ट जर्मन (पिएसजी) र बायर्न म्युनिख दुवै विजयी रहे । पिएसजीले सेल्टिकलाई ५-० ले हरायो भने बायर्न एन्डरलेक्टसँग ३-० ले विजयी रह्यो ।

एन्डरलेक्टका खेलाडी स्भेन कम्सले खेलको ११ औँ मिनेटमा रातो कार्ड पाएपछी एन्डरलेक्टले बाँकी खेल १० खेलाडीमा सीमित भएको थियो ।रातो कार्ड पश्चात बायर्न म्युनिखले पाएको पेनाल्टीलाई रोबर्ट लेवान्डोस्किले गोलमा परिणत गर्दै बायर्नलाई अग्रता दिलाएका थिए । दोस्रो हाफमा जोसुवा किमिचको पासलाई सदुपयोग गर्दै थिआगो आलाकान्टाराले स्कोर २-० बनाएका थिए । त्यसैगरी खेलको अन्तिम समयमा किमिचले आफैंले गोल गर्दै बायर्न म्युनिखको यस सिजनको च्याम्पियन्स लिगको सुरुवातलाई सुखद बनाएका थिए ।

त्यस्तै समूह ‘बि’को अर्को खेलमा पेरिस सेन्ट जर्मनले सेल्टिकलाई ५-० ले हराउन सफल रह्यो । पिएसजीका फर्वाड एडेन्सन काभानी, नेयमार र किलियन बाप्पे तीनै जनाले पुन: गोल सूचिमा अाफ्नो नाम दर्ता गर्न सफल भए । पहिलो हाफमा नेयमार, बाप्पे र काभानीले गोल गरेका थिए भने दोस्रो हाफको ८५ औँ मिनेटमा पाएको पेनाल्टीलाई सदुपयोग गर्दै काभानीले खेलमा आफ्नो दोस्रो र पिएसजीको पांचौँ गोल गरेका थिए ।

सेल्टिकले ८३ औँ मिनेटमा एक आत्मघाती गोल पनि गरेको थियो । यस खेलमा गोलसँगै बाप्पे च्याम्पियन्स लिगमा दुई भिन्न टोलीबाट (मोनाको र पिएसजी) गोल गर्ने सबै भन्दा कान्छा खेलाडी पनि बनेका छन। त्यस्तै काभानी पनि २२ गोलसँगै च्याम्पियन्स लिगमा पिएसजीका लागि सबैभन्दा बढी गोल गर्ने खेलाडी बने । च्याम्पियन्स लिगमा २० वर्षभन्दा कम उमेरको खेलाडीका लागि सर्वाधिक बढी गोल गर्ने किर्तिमान प्याट्रिक क्लुइभर्टको (७ गोल) नाममा छ । गएराती बाप्पेले सो किर्तिमान पनि बराबरी गरेका छन् ।