पेरिस (एजेन्सी)– पेरिस सेन्ट जर्मेन (पिएसजी) का प्रशिक्षक उनाई इर्मीले इडिन्सन काभानी र नेयमारले पेनाल्टी र फ्रिकिकका विषयमा हुने समस्या आपसी सहमतिमा टुंगाउन सुझाएका छन् ।

लियोनलाई आइतबार २–० ले हराएको खेलमा नेयमार र काभानीबीच विवाद भएको थियो । पेनाल्टी बक्स बाहिर पिएसजीले पाएको फ्रि किक ड्यानी एल्भेसले नेयमारलाई हान्न लगाएपछि काभानी आक्रोषित भएका थिए । त्यस्तै केलियन बाप्पेलाई लियोनका रक्षकले लडाउँदा पिएसजीले दोस्रो हाफमा पेनाल्टी समेत पाएको थियो । नेयमारले सो पेनाल्टी लिन खोजे पनि काभानी मानेका थिएनन् । काभानीको प्रहार गरेको पेनाल्टी गोलकिपरले बचाएका थिए ।

प्रशिक्षक इर्मीले उनीबीचको असमझादरी हटाउनु पर्नेमा जोड दिएका छन् । यदि त्यस्तो हुन नसक्दा आफुले हस्तक्षेप गर्नुपर्ने उनले बताएका छन् । ‘ मैले उनीहरुलाई आपसी असमझारी हटाउन भनेको छु । पेनाल्टी हाम्रोमा थोरै खेलाडीले मात्र हान्छन् । त्यसमा काभानी एक हुन् हो भने अर्को नेयमार’ उनले भने, ‘कसले पेनाल्टी हान्ने भन्नेमा भलाद्मी सहमति गर्दा हुन्छ । यो नितान्त आन्तरिक विषय हो । किनकी दुवै पेनाल्टी हान्न सक्षम छन् । त्यसका लागि मैले उनीहरुलाई सहमति गर्न भनेको छु ।’

सहमती हुन नसक्दा भने आफुले हस्तक्षेप गर्नुपर्ने प्रशिक्षक इर्मीले प्रष्ट पारेका छन् । उनले भने, ‘यदि त्यहा सहमति भएन भने म निर्णय लिनेछु । यो समस्याका रुपमा रहोस् भन्ने हामी चाहदैनौं ।’ पिएसजीले यो सिजनमा दमदार सुरुआत गरेको छ । टोली सिजनका सबै ६ खेल जित्दै १८ अंकका साथ शीर्षस्थानमा रहेको छ ।