पेरिस (एजेन्सी) – एडिन्सन काभानी र नेयमारलाई आइतबार रातिको लिग १ को खेलपछि ड्रेसिङ्ग रुममा छुट्टाछुट्टै राख्न परेको बताइएको छ । लियोनमाथि पिएसजीले २-० ले जितेको खेलमा काभानी र नेयमार बीच पेनाल्टी र फ्रिकिक कसले हान्ने भन्ने विषयमा खेलमै विवाद भएको थियो । पिएसजीले खेल सजिलैले जिते पनि काभानी र नेयमार त्यस खेलका चर्चाका विषय बनेका छन् ।

काभानीले लिन खोजेको फ्रिकिकलाई ड्यानी एल्भेसले नेयमारलाई हान्न लगाएका थिए । त्यसै गरी किलियन बाप्पेलाई लियोनका रक्षकले डि-बक्स भित्र लडाउँदा पिएसजीले पेनाल्टी जितेको थियो । काभानी पिएसजीका नियमित पेनाल्टीकर्ता भएकाले उनले नै त्यो पेनाल्टी लिन अघि बढेका थिए ।

नेयमार सो पेनाल्टी लिन इच्छुक देखिए पनि काभानीले नेयमारलाई पछि हटाएका थिए । तर काभानी त्यो पेनाल्टीमा चुकेपछी थप तनाव सिर्जना भएको थियो । ती फ्रिकिक र पेनाल्टीको घटनापश्चात काभानी र नेयमार स्पष्ट रुपमा एकअर्कासँग असन्तुष्ट देखिन्थे । तर खेल सकिएपछी पनि दुई खेलाडी बीच असहमति नसकिएको भन्ने खबर फ्रान्सको पत्रिका लेक्युपले जनाएको छ ।

टोलीका अन्य खेलाडीहरुले समेत काभानी र नेयमार बीच ठुलो विवाद नचर्कियोस् भनेर हस्तक्षेप गर्दै उनीहरुलाई छुट्टै राख्न परेको बताइएको छ । पिएसजीका प्रशिक्षक उनाइ एम्रीले समेत काभानी र नेयमारलाई पेनाल्टी र फ्रिकिकको जिम्मेवारी आफैँ सल्ट्याउन अह्राएका छन् । सहमति हुन नसके उनले आफैँ त्यो निर्णयमा हस्तक्षेप गर्ने समेत उनले प्रष्ठ पारिसकेका छन् ।

गत साल बार्सिलोनामा फ्रिकिक र पेनाल्टी जस्ता जिम्मेवारी लियोनल मेस्सीसँग बाड्ने गरेका नेयमार यसै सिजन पिएसजीमा विश्वकै महँगो खेलाडीका रुपमा आएका हुन् । पिएसजीका लागि नेयमारले सबै प्रतियोगितामा ५ गोल गरिसकेका छन् भने काभानीको ११ गोल रहेको छ । पिएसजी शतप्रतिशत नतिजासहित घरेलु लिगको शीर्ष स्थानमा रहेको छ ।