साउथह्याम्पटन (एजेन्सी)– साउथह्याम्पटनलाई १–० ले हराउँदै म्यानचेस्टर युनाइटेडले यस सिजनको अपराजित यात्रालाई निरन्तरता दिएको छ । युनाइटेडका लागि निर्णायक गोल रोमेलु लुकाकुले गरे ।
पहिलो हाफको २० औँ मिनेटमा पोस्ट नजिकैबाट लुकाकुले गरेको प्रहारबाट गोलभएपछि युनाइटेडले अग्रता लिएको थियो । यो गोलसँगै लुकाकुले लुइस साहाको युनाइटेडका लागि पहिलो ६ खेलमा गोल गर्ने कीर्तिमानसँग बराबरी गरेका छन् ।
युनाइटेडले पहिलो हाफको अन्तिम मिनेटमा गोलअन्तर दोब्बरको अवसर पाएको थियो । तर मार्कोस रासफोर्डले प्रहार गरेको फ्रिकिक गोलपोस्टबाट थोरै बाहिरिएको थियो ।
त्यस्तै साउथह्याम्पटनका ओरियल रोमेउ टोलीलाई दोस्रो हाफमा बराबरी गर्नबाट चुकेका थिए । साउथह्याम्पटनले दोस्रो हाफमा पहिलो हाफको तुलनामा बढी अवसर सिर्जना गरेपनि तिनलाई परिणत भने गर्न सकेको थिएन ।
यस जितसँगै युनाइटेड छिमेकी म्यानचेस्टर सिटीसँग गोल अन्तरका हिसाबमा प्रिमियर लिगको दोस्रो स्थानमा छ भने साउथह्याम्पटन अंकतालिकाको ११ औं स्थानमा झरेको छ ।
