म्यानचेस्टर (एजेन्सी) – म्यानचेस्टर सिटीले क्रिस्टल प्यालेसमाथि ५-० को सहज जित दर्ता गरेको छ । यस जितसँगै सिटी प्रिमियर लिगको अंक तालिकाको शीर्षस्थानमा रहन सफल भएको छ ।
लेरोय सानेले पहिलो हाफको अन्तिम मिनेटतिर सिटीलाई खेलमा अग्रता दिलाएका थिए । त्यसपछी रहिम स्टेर्लिङले ५१ औँ र ५९ औँ मिनेटमा गोल गर्दै सिजनको आफ्नो चौथो र पाँचौं गोल गरे । त्यसैगरी अघिल्लो खेलमा ह्याट्रिक गरेका सर्जियो अगुएरोले सानेको पासमा सिटीको चौथो गोल गरे ।
त्यस्तै फेबियन डेल्फले ८९ औँ मिनेटको गोल गर्दै सिटीलाई लिगको लगातार तेस्रो भारी अन्तरको जित दिलाए । यस अघि सिटीले वाटफोर्डलाई ६-० र लिभरपुललाई ५-० ले हराएको थियो ।
सिटी आफ्नो छिमेकी म्यानचेस्टर युनाइटेडसँग समान अंकमा रहे पनि गोल अन्तरका आधारमा अंक तालिकाको शीर्षस्थानमा उक्लेको हो । त्यस्तै क्रिस्टल प्यालेस भने यस सिजन गोलविहीन तथा अंक विहीन रहँदै पुछारमा छ ।
यस अघि टोटनह्यामले वेस्ट ह्यामलाई ३-२ ले हराएको थियो । टोटनह्यामको जितमा ह्यारी केनले दुई गोल गरे भने क्रिस्टियन एरिक्सनले एक गोल गरे । वेस्ट ह्यामका लागि चिचारिटो र चेखो कुयाटेले एकएक गोल गरेका थिए । सो खेलमा टोटनह्यामका नव डिफेन्डर सर्ज अरियरले दोस्रो हाफको ७० औँ मिनेटमा रातो कार्ड पाएका थिए ।
आज प्रिमियर लिगमा खेलिएका अन्य खेलहरुको नतिजा-
बर्नली ०-० हडर्सफिल्ड
एभर्टन २-१ बोर्नमाउथ
स्वान्सी सिटी १-२ वाटफोर्ड
स्टोक ०-४ चेल्सी
साउथह्याम्पटन ०-१ म्यानचेस्टर युनाइटेड
