पेरिस् (एजेन्सी) – यस सिजन फ्रान्सेली लिग १ मा अपराजित रहेका दुई टोली पेरिस सेन्ट जर्मन (पिएसजी) र बोर्डो आज पिएसजीको घरेलु मैदानमा आम्ने–साम्ने हुँदैछन् । खेल आज राति नेपाली समयअनुसार ८.४५ बजे सुरु हुने छ ।
लिग १ का ७ खेलमा २१ गोल गोल गर्न सफल पिएसजी निकै राम्रो लयमा रहेको छ । उसले च्याम्पियन्स लिगमा बायर्न म्युनिखमाथि ३–० को शानदार जित पनि दर्ता गरेको थियो । अर्को तर्फ बोर्डो पनि पिएसजी जस्तै लिगमा अपराजित रहेको छ ।
लिगको पछिल्लो खेलमा भने पिएसजी मार्सेसँग ०–० को बराबरीमा रोकिएको थियो । त्यस खेलमा चोटका कारण पिएसजीका स्टार खेलाडि नेयमार टोलीमा सहभागि भएका थिएनन् । यस खेलमा भने नेयमार सामेल हुँदै एडिन्सन काभानी र किलियन बाप्पेलाई अग्रपंक्तिमा सघाउने छन् ।
आफ्नो अघिल्लो खेलमा गुइनग्याम्पलाई ३–१ ले हराएको र यस सिजन अपराजित रहँदै तालिकाको तेस्रो स्थानमा रहेको बोर्डोले पिएसजीलाई निराश पार्न खोज्ने छ । आफ्ना पछिल्ला २७ घरेलु खेलमा अपराजित रहेको पिएसजी भने सिजनको अपराजित यात्रा लम्ब्याउँदै तालिकको अग्रस्थानमा आफ्नो पकड अझ जमाउने दाउमा हुने छ ।
