म्याड्रिड (एजेन्सी) – एक पटकको विश्व विजेता स्पेन अर्काे वर्ष रुसमा आयोजना हुने विश्वकप फुटबलका लागि छनोट भएको छ ।

युरोपियन क्षेत्रको छनोट अन्तर्गत शुक्रबार राति भएको खेलमा अल्बानियामाथि ३–० को सहज जित निकालेपछि एक खेल बाँकी छदै स्पेनले विश्वकपमा स्थान सुरक्षित गरेको हो । युरोपियन क्षेत्रको समूह ‘जी’ मा रहेको स्पेनले छनोट चरणको ९ खेलबाट २५ अंक जोड्दै शीर्ष स्थानमा रहँदै विश्वकपमा स्थान सुरक्षित गरेको हो । स्पेनको सहज जितमा रोड्रिगो, इस्को र थिएगो अल्कान्ताराले गोल गरे । तीनै गोल पहिलो हाफमा सम्भव भएको थियो । १६ औं मिनेटमा रोड्रिगोले गोल गर्दै स्पेनलाई सुरुआती अग्रता दिलाए । रोड्रिगोले इस्कोको पासमा गोल गरेका थिए । पहिलो गोलको लागि पास मिलाएका इस्कोले २३ औं मिनेटमा कोकीको पासमा गोल गर्दै अग्रता दोब्बर पार्दा त्यसको ३ मिनेट पछि नै थिएगो आल्कान्ताराले गोल गर्दै अग्रता तेब्बर पारे । दोस्रो हाफमा गोलको अवसर सिर्जना गरेपनि थप गोल हुन नसक्दा स्पेनले सहज जित निकाल्यो ।

यसै समूहमा रहेको चार पटकको विजेता इटाली भने मेसेडोनियासँग १–१ को बराबरीमा रोकिएपछि प्ले अफ खेल्नुपर्ने भएको छ । ४० औं मिनेटमा जर्जियो चिलियानीको गोलबाट अग्रता लिएको इटालीले त्यो अग्रता जोगाउन सकेन । ७७ औं मिनेटमा एलेक्सान्डर त्रानकोभोस्कीले मेसेडोनियाका लागि बराबरी गोल फर्काए । त्यसपछि थप गोल हुन नसक्दा दुवै टिमले अंक बाँडे । बराबरीसँगै इटालीको ९ खेलबाट २० अंकसहित दोस्रो स्थानमा रहेको छ । अर्को खेलमा इजरायलले लिचेस्टाइनलाई १–० ले हरायो ।

विश्वकप छनोटका अन्य खेलका नतिजाहरु

अष्ट्रियाविरुद्ध सर्विया ३–२
आयरल्याण्डविरुद्ध माल्दोभा २–०
जर्जियाविरुद्ध वेल्स ०१
क्रोएसियाविरुद्ध फिनल्याण्ड १–१
कोसोभोविरुद्ध युक्रेन ०–२
टकीविरुद्ध आइसल्याण्ड ०–३