सिड्नी (एजेन्सी) – युद्धग्रस्त मुलुक सिरियाको अर्काे वर्ष रुसमा आयोजना हुने विश्वकप फुटबल खेल्ने सपना अधुरो रहेको छ ।प्ले अफको दोस्रो लेगमा युद्धग्रस्त राष्ट्र सिरिया अष्ट्रेलियासँग २–१ ले तथा समग्रमा ३–२ को हार बेहोरेपछि सिरियाको पहिलोपटक विश्वकप खेल्ने सपना चक्नाचुर भएको छ ।
अष्ट्रेलियालाई जिताउन दुवै गोल टिम काहिलले गरे भने ओमार अल सोमाहले सिरियाका लागि गोल गरे । अष्ट्रलियासँग पराजित भएसँगै खेलमा शुरुवाती अग्रता पनि सिरियाले नै लिएको थियो । छैटौ मिनेटमा ओमार अल सोमाहको गोलबाट सिरियाले शुरुवाती अग्रता लिएको थियो । तर, सिरियाको त्यो अग्रता लामो समय टिक्न सकेन । १३ औं मिनेटमा टिम काहिलले अष्ट्रेलियाका लागि बराबरी गोल फर्काए ।
त्यसपछि निर्धारित समयमा थप गोल निस्कन नसक्दा खेल अतिरिक्त समयमा धकेलिएको थियो । अतिरिक्त समयको १०९ औं मिनेटमा काहिलले गोल गर्दै अष्ट्रेलियालाई जित दिलाए । सिरियाविरुद्ध दुई गोल गरेसँगै टिम काहिलले अन्तर्राष्ट्रिय गोल सङ्ख्या ५० पुर्याएका छन् ।
अब अष्ट्रेलियाले अन्तिम प्ले अफको रुपमा पानामा र होन्डुरसबीचको विजेतासँग खेल्नेछ । फाइनल चरणको प्ले अफ नोभेम्वरमा हुनेछ ।
