कोल्हुवा (हाम्रो खेलकुद) – ए डिभिजन टोली नेपाल एपिएफ क्लब नवलपरासीमा जारी दोस्रो राइनो संरक्षण गोल्डकप फुटबल प्रतियोगिताको सेमिफाइनलमा पुगिेको छ । कोल्हुवामा आइतबार नवलपरासीको देशभक्त युवा क्लबलाई २–० ले हराउँदै विभागिय टोलीले अन्तिम चारको यात्रा तय गरेको हो । हिजो अर्को ए डिभिजन टोली सिएमजी क्लब संकटा पनि अन्तिम चारमा पुगिसकेको छ ।

एपिएफ फुटबल टोली । फाइल तस्बिर

खेलको अन्त्यतिर दुई गोल गर्दै एपिएफले सफलता प्राप्त गरेको थियो । ७७ औं मिनेटमा युवराज खड्काको गोलबाट एपिएफले खेलमा अग्रता लिएको थियो । इन्जुरी समयमा रन्जन विष्टले गोल गरेपछि एपिएफको जित निश्चित भएको थियो । एपिएफले मंगलबार फाइनल प्रवेशका लागि कास्की–११ को सामना गर्नेछ ।

‘संरक्षणका लागि खेलकुद’ भन्ने उद्देश्यका साथ राईनो संरक्षण गोल्ड कप फुटबल प्रतियोगिता आयोजना भएको हो । प्रतियोगितामा सोमबार हुने पहिलो सेमिफाइनलमा संकटा र काठमाडौंको डिभाइन ब्वाइज युनियनबीच प्रतिस्पर्धा हुनेछ ।

नन्द भाउजु उपभोक्ता समितिले आयोजना गरेको प्रतियोगिताको विजेताले उपाधिसहित ५ लाख २५ हजार ५५ हजार रुपैयाँ प्राप्त गर्नेछ । विजेता टोलीलाई एक दिनको होम स्टे र चितवन राष्ट्रिय निकुञ्ज अवलोकनको समेत आयोजकले व्यवस्था मिलाउने बताइएको छ । त्यस्तै दोस्रो टोलीले २ लाख ५० हजार ३ सय ५५ रुपैयाँ पाउनेछ ।