लण्डन (एजेन्सी) – प्रिमियर लिग टोली वेस्ट ह्याम युनाइटेडले आफ्नो प्रशिक्षक स्लाभान बिलिचलाई बर्खास्त गरेको छ । साढे दुई वर्ष क्लब सम्हालेका बिलिचलाई वेस्ट ह्यामको खराब सुरुवातका कारण बर्खास्त गरिएको हो ।
वेस्ट ह्यामले यो साता प्रिमियर लिगमा लिभरपुलसँग घरेलु मैदानमा ४-१ ले पराजय भोगेको थियो । त्यस अघि पुछारमा रहेको क्रिस्टल प्यालेससँग २-२ को बराबरी खेलेको थियो भने ब्राइटनसँग ३-० ले हारेको थियो ।
“हामी स्लाभान बिलिचप्रति उनको साढे दुई वर्षको कार्यकालका लागि आभारी छौं । तर अब क्लबलाई परिवर्तनको खाँचो रहेको छ,” वेस्ट ह्यामले आफ्नो ट्विटरमा लेखेको थियो । बिलिचसँगै उनको सहायक टिमले पनि क्लब छोड्ने छ ।
बिलिच पहिले स्वयम् वेस्ट ह्यामका खेलाडि थिए । सन् १९९६ देखि १९९७ सम्म उनले १८ महिना डिफेन्डरका रुपमा वेस्ट ह्यामबाट खेलेका थिए । त्यस्तै क्रोएसियाका प्रिशिक्षक रहिसकेका बिलिच २०१५ मा स्याम एलर्डाइसको ठाउँमा वेस्ट ह्याम आएका थिए ।
आफ्नो पहिलो सिजनमा वेस्ट ह्यामलाई सातौं स्थानमा पुर्याएका बिलिचले यस वर्ष भने राम्रो नतिजा निकाल्न निकै संघर्ष गरिरहेका थिए । हाल ११ खेलमा २ जितसहित ९ अंकका साथ वेस्ट ह्याम १८ औं स्थानमा रहेको छ ।
