काठमाडौं (हाम्रो खेलकुद)– अर्को साता फिलिपिन्सविरुद्ध हुने एएफसी एसियन कप छनोट चरणको खेलका लागि नेपाली राष्ट्रिय टोलीका पहिलो रोजाइका गोलकिपर किरण चेम्जोङ माल्दिभ्सबाट बुधबार स्वदेश आइपुग्ने भएका छन् ।

माल्दिभ्सको टिसी स्पोर्टस् क्लबबाट व्यवासायिक फुटबल खेल्दै आएका किरण आज राती १० बजे माल्दिभ्सबाट दुबई हुँदै भोली स्वदेश आइपुग्ने छन् । नेपाल फिलिपिन्सबीच कात्तिक २८ मा प्रतिस्पर्धा हुँदैछ । नेपाली खेलाडी अहिले बन्द प्रशिक्षणमा रहेका छन् । अस्ट्रेलियामा रहेका मिडफिल्डर जगजित श्रेष्ठ पनि यसपटक प्रशिक्षणमा समेटिएका छन् । यसअघि विदेशमा व्यवसायिक फुटबल खेल्दै आएका किरण र इन्डोनेसियामा खेल्दै आएका रोहित चन्द मात्र बोलन्थे ।

चार राष्ट्र रहेको समूह एफबाट नेपाल अघिल्लो चरण पुग्ने सम्भावना लगभग टुंगिएपनि बलियो राष्ट्रसँगको खेल अर्को वर्ष हुने साफ च्याम्पियनसिपका लागि फाइदा पुग्ने किरणको अनुमान छ । ‘एसियन कप छनोटमा जति सक्दो राम्रो खेल्ने हाम्रो प्रयास हुनेछ ’ हाम्रो खेलकुद डटकमसँग किरणले भने, ‘अब यसमा हामीसँग धेरै विकल्प छैन । त्यसले यो खेलमा जति सक्दो टोलीको कमजोरी सुधार्ने प्रयास गर्नुपर्दछ । ’

नेपाल १ अंकसहित पुछारमा रहेको छ । फिलिपिन्स ८ अंकसहित शीर्षस्थानमा छ भने समान ६ अंक भएका यमन दोस्रो र ताजकिस्तान तेस्रो स्थानमा छ । ताजकिस्तानसँग दुई पटक हारिसकेको नेपाल पहिलो खेलमा फिलिपिन्ससँग ४–१ ले पराजित भएको थियो । नेपालले एकमात्र खेल घरेलु मैदानमा यमनसँग बराबरी गरेको थियो । फिलिपिन्सपछि नेपालले यमनसँग अन्तिम खेल खेल्नेछ ।

राष्ट्रिय टोलीको प्रदर्शन सोचे अनुरुप नभएपनि किरणको माल्दिभियन क्लब भने त्यहाँको धिवेही प्रिमियर लिग (डिपिएल) को उपाधि दौडमा रहेको छ । यद्दपी डिपिएलका बाँकी दुई खेल जितेपनि टिसी स्पोर्टस्ले उपाधिको छिनोफानोको लागि अन्य खेलको नतिजा कुर्नुपर्ने हुन्छ । टिसी स्पोर्टस अंक तालिकाको दोस्रो स्थानमा छ ।

१२ चरणको खेल सकिदा न्यू रेडियन्ट ३३ अंकका साथ शीर्षस्थानमा छ । अबको खेल सबैभन्दा महत्वपूर्ण हुने किरणले बताए । ‘हामी अझै ४ अंकले पछाडि छौं ’ उनले भने,‘त्यो खेल जित्न सकेको खण्डमा उपाधि जित्ने सम्भावना अन्तिम खेल सम्म पनि बाँकी रहन्छ । अबको खेल गुमायौं भने हाम्रो सम्भावना टुंगिन्छ ।’