काकारभिट्टा (हाम्रो खेलकुद) –लक्ष्मी हुन्डाई मनाङ मस्र्याङ्दी क्लब मेची नेत्रालय काकरभिट्टा गोल्ड कप फुटबल प्रतियोगिताको फाइनलमा पुगेको छ । आयोजक काकरभिट्टा फुटबल ट्रेनिङ सेन्टरलाई आज सडन डेथमा हराउँदै मनाङ लगातार दोस्रो साता दोस्रो नकआउट फुटबल प्रतियोगिताको उपाधि नजिक पुगेको हो ।

निर्धारित समय गोलरहित बराबरीमा सकिएपछि सडन डेथमा मनाङ ८–७ ले विजयी भएको थियो । पेनाल्टी सुट आउटमा पनि ४–४ को बराबरीपछि सडन डेथमा मनाङले बाजी मारेको थियो । सडन डेथमा अफ्रिकी मुलका फ्लोरेन्सको प्रहार बाहिरिएपछि मनाङ विजयी भएको थियो । सडन डेथमा मनाङ विमल घर्ती मगर, विराज महर्जन, विशाल राई र अनन्त तामाङले गोल गरे । काकरभिट्टाका लागि भुषण लिम्बु, सुरज सुनार र विष्णु सुनारले गोल गरे ।

त्यसअघि पेनाल्टी सुट आउटमा मनाङका लागि कप्तान अनिल गुरुङ, विमल बस्नेत, कमल श्रेष्ठ र हेमन गुरुङले गोल गरे । काकरभिट्टाका लागि निराजन खड्का, प्रकाश बुढाथोकी, सरोज दहाल र हेमन्त थापा मगरले गोल गरे । मनाङका विक्रम लामा र काकरभिट्टाका निशान लिम्बुको प्रहार विपक्षी गोलकिपरले रोकेका थिए ।

राष्ट्रिय टोलीका ८ खेलाडी उतारेको मनाङले गोलको खडेरी भने तोड्न सकेन । दुवै टोली १० खेलाडीमा सिमित हुँदै खेलको अन्त्य गरेका थिए । ५८ औं मिनेटमा काकरभिट्टाका खमिरले रातो कार्ड पाएका थिए । त्यस्तै मनाङका सुजल श्रेष्ठले ६९ औं मिनेटमा रातो कार्ड पाएका थिए । मनाङका हेमन म्यान अफ दी म्याच घोषित भए र उनले १० हजार रुपैयाँ प्राप्त गरे ।

मनाङ काकरभिट्टामा लगातार दोस्रो खेलमा सडन डेथमा विजयी भएको हो । क्वार्टरफाइनलमा टोलीले अग्नी रुपन्देही ११ लाई सडन डेथमा नै हराएको थियो । फाइनलमा मनाङले अब शुक्रबार त्रिभुवन आर्मी क्लबको सामना गर्नेछ । आर्मी अर्को विभागिय टोली नेपाल पुलिस क्लबलाई ३–० ले हराएको थियो । मनाङ र आर्मीबीच लगातार दोस्रो साता दोस्रो पटक उपाधि भिडन्त हुने भएको छ ।

मंसिर ७ गते यी दुई टोली सताक्षी गोल्ड कप फुटबल प्रतियोगिताको फाइनल खेलेका थिए । जसमा आर्मी च्याम्पियन बनेको थियो । मनाङ गत वर्षको सर्वाधिक सफल टोली हो । गत वर्ष टोलीले ४ नकआउट उपाधि जित्दा आर्मी र सिएमजी क्लब संकटाले समान ३ उपाधि जितेका थिए । मोसफलको सर्वाधिक पुरस्कार राशी रहेको काकरभिट्टा गोल्ड कपको विजेताले उपाधिसहित ८ लाख रुपैयाँ प्राप्त गर्नेछ ।