म्यानचेस्टर (एजेन्सी) – गए राति प्रिमियर लिगमा अग्रस्थानमा रहेको म्यानचेस्टर सिटीले साउथह्याम्पटनलाई २-१ ले हराएको छ । सिटीको लागि इन्जुरी समयमा रहिम स्टेर्लिङले निर्णायक गोल गरेका थिए ।
केभिन डे ब्रुयनले खेलको ४७ औं मिनेटमा गोल गर्दै सिटीलाई अग्रता दिलाएका थिए । तर साउथह्याम्पटनका ओरियल रोमेउले ७५ औं मिनेटमा एक गोल फर्काए । सिटीको जितको यात्रालाई कायम राख्दै अन्तिम समयमा स्टेर्लिङले गरेको प्रहार टोलीलाई खेलबाट ३ अंक लिन पनि पर्याप्त रह्यो ।
त्यस्तै एन्टोनियो रुडिगरको गोलको मद्दतले चेल्सीले स्वान्सिलाई १-० ले हराउन सफल रह्यो । अर्को बलियो टोली आर्सनलले हडर्सफिल्डमाथि ५-० को जित दर्ता गर्यो । आर्सनलका लागि ओलिभर जिरुडले दुई गोल, एलेक्जान्डर लाकाजेट , मेसुट ओजिल र एलेक्सिस सान्चेजले एकएक गोल गरे ।
साडियो मानेको एक तथा मोहम्मद सालाहको दुई गोलको मद्दतले लिभरपुल पनि स्टोकलाई ३-० ले हराउन सफल भयो । एभरटनको वेस्ट ह्याममाथि ४-० को जितमा वायन रुनीले ह्याट्रिक पनि गरेका थिए ।
