लण्डन (एजेन्सी) – प्रिमियर लिगको दोस्रो स्थानमा रहेको म्यानचेस्टर युनाइटेडले आर्सनललाई ३-१ ले हराएको छ । युनाइटेडको जितमा जेसे लिन्गार्डले दुई गोल गरेका थिए ।
म्यानचेस्टर युनाइटेडले खेलको सुरुवाती केहि मिनेटमै २-० को अग्रता लिएको थियो । डिफेन्डर एन्टोनियो भ्यालेन्सियाले पहिलो गोल गरेका थिए भने दोस्रो गोल जेसे लिन्गार्डले गरेका थिए ।
आर्सनलका एलेक्जान्डर लाकाजेटले दोस्रो हाफको ४८ औं मिनेटमा एक गोल फर्काए पनि लिन्गार्डले पुन: ६३ औं मिनेटमा गोल गर्दै टोलीको जित सुनिश्चित गरे ।
७६ औं मिनेटमा मिडफिल्डर पल पोग्बा रातो कार्ड खाँदै मैदान छोडेका थिए । यस खेलमा आर्सनल निकै राम्रो खेले पनि युनाइटेडका गोलकिपर डेभिड डे गेयाले १४ बचाऊ गर्दै घरेलु टोलीलाई कुनै मौकै दिएनन् ।
यस जितसँगै युनाइटेड तालिकाको दोस्रो स्थानमा यथावत् छ भने आर्सनल एक स्थान तल खसै पाँचौंमा पुगेको छ ।
