म्याड्रिड (एजेन्सी) – च्याम्पियन्स लिग समूह चरणको अन्तिम खेलमा रियलको जितमा क्रिस्टियानो रोनाल्डोले गोल गर्दै अर्को किर्तिमान बनाएका छन् । हाल च्याम्पियन्स लिगको सर्वाधिक गोलकर्ताको किर्तिमान आफ्नो नाममा राखेको रोनाल्डोले समूह चरणको सबै खेलमा गोल गर्ने पहिलो खेलाडी बनेका हुन् ।
च्याम्पियन्स लिगमा १ सय १४ गोल गरेका पोर्चुगेली स्टार रोनाल्डोको नाममा एकै सिजनमा समूह चरणमा सर्वाधिक गोल गर्ने किर्तिमान पनि छ (२०१३/१४ मा १७ गोल)। तर समूह चरणको सबै ६ खेलमा कुनै खेलाडीले गोल गरेको थिएनन। १९९५ /९६ मा डेल पिएरो र १९९७/९८ मा शेर्ही रेब्रोभले पहिलो ५ खेलमा गोल गरेपनि छैठौ खेलमा गोल गरेका थिएनन ।
बोरुसिया डर्टमाउण्डसँगको ३-२ को जितमा रोनाल्डोले १२ औं मिनेटमा रियलको दोस्रो गोल गर्दै उक्त किर्तिमान आफ्नो नाममा गरेका हुन् । समूह चरणको अन्तिम खेलमा विजयी भएपनि रियल उपविजेताको रुपमा अन्तिम १६ मा भिड्ने छ । एपोएल निकोसालाई २-० ले हराएको टोटेनह्याम समूह विजेता बनेको हो ।
