पेरिस (एजेन्सी) – रियल म्याड्रिडका सुपरस्टार क्रिस्टियानो रोनाल्डोले पाँचौ पटक बलोन डि ओर अवार्ड हात पारेका छन् । मेस्सी र नेयमारलाई पछि पार्दै रोनाल्डोले उपाधि जितेका हुन् । मेस्सी दोस्रो र नेयमार तेस्रो भए । २००८ , २०१३ , २०१४ , २०१६ र यसपटक गरेर यो रोनाल्डोको पाँचौ उपाधि हो ।

अघिल्लो सिजन रोनाल्डोले म्याड्रिडलाई च्याम्पियन्स लिग र २०१२ यता पहिलो पटक ला लिगाको उपाधि जित्न महत्वपूर्ण भूमिका निर्वाह गरेका थिए । पोर्चुगललाई युरो-२०१६ जित्न सघाएका रोनाल्डोले म्याड्रिडका लागि अघिल्लो सिजन सबै खेलहरुमा ४२ गोल गरेका थिए ।

रोनाल्डोले ९४६ अंक प्राप्त गरेका थिए भने दोस्रो भएका मेस्सीले ६७० अंक प्राप्त गरे। त्यस्तै हाल पेरिस सेन्ट जर्मनमा रहेका नेयमार ३६१ अंकसहित तेस्रो भए । शीर्ष दशमा क्रमश : जियानलुइजी बुफोन, लुका मोड्रिच, सर्जियो रामोस, किलियन बाप्पे, एन्गोलो कान्टे, रोबर्ट लेवान्डोस्की र ह्यारी केन छन् ।

‘म हरेक वर्ष यो अपेक्षा गरेको हुन्छु । म रियलका साथिहरुलाई र मलाई यस उपाधि जित्न मद्धत गर्ने सबैलाई धन्यबाद दिन चहान्छु ‘, रोनाल्डोले पेरिसको आइफेल टावरमा उपाधि पाएपछि भने ।

‘मेस्सीसँगको मेरो प्रतिस्पर्धा चलिरहोस् भने कामना गर्छु किनभने यो राम्रो कारणको लागि नै भइरहेको छ ‘, उनले थपे ।

फ्रान्स फुटबलले प्रदान गर्ने यस अवार्डमा ६ वर्ष फिफाको पनि साथ थियो । तर सेप्टेम्बर २०१६ यता फिफाले यस अवार्डबाट आफ्नो सहभागिता फिर्ता लिएको हो । बलोन डिमा  ओर संसार भरका १ सय ७३ पत्रकारहरूले भोट गर्छन् ।