पेरिस (एजेन्सी) – फ्रान्सेलि लिग १ मा आज अग्रस्थानमा रहेको पेरिस सेन्ट जर्मन (पिएसजी) लिलको सामना गर्दै छ । पिएसजीको घरेलु मैदानमा खेलिने सो खेल नेपाली समय अनुसार रातिको ९.४५ बजे सुरु हुने छ ।
पिएसजीका लागि नेयमार उपलब्ध हुने छैनन् । यस सिजन पाँच पहेंलो कार्ड पाइसकेकाले आज उनी खेल्न प्रतिबन्धित छन् । उनको स्थान जुलियन ड्राक्सलर वा एन्जल डि मारियाले लिने देखिन्छ । त्यस्तै कप्तान थियागो सिल्भा पनि चोटिल छन् ।
भ्रमणकारी टोली लिलका लागि फोडे बालो-टुरे प्रतिबन्धित छन् । लिलको १६ खेलमा १८ अंक छ । हाल अंकतालिकामा लिल १७ औं स्थानमा छ । पिएसजीले भने आफ्ना पछिल्ला दुई खेलमा हार बेहोरेको थियो ।
त्यसैले पिएसजी तुलनात्मक रुपमा कमजोर रहेको लिलमाथि जित हांसिल गर्दै आफ्नो जितको यात्रामा फर्किने तरखरमा हुने छ । पिएसजी ४१ अंकसहित दोस्रोमा रहेको मोनाकोभन्दा ९ अंकले अगाडि रहेको छ ।
