काठमाडौं (हाम्रो खेलकुद) – आसन्न निर्वाचन सम्बन्धि विश्व फुटबल महासंघ (फिफा) को पत्र प्राप्त भइ नसकेपछि अखिल नेपाल फुटबल संघ (एन्फा) को केन्द्रिय समितिको बैठक आज बस्दैछ । बैठकमा मुख्यतः निर्वाचनकै विषयमा छलफल हुने बताइएपनि अब नयाँ प्रस्तावित मितिलाई फिफाले स्वीकृति दिन्छ दिदैन भन्नेमा एन्फा कुरिरहेको छ ।

‘पूर्व निर्धारित समयमा निर्वाचन गर्न नसक्नुको कारण खुलाएर हामीले पत्र डिसेम्बर ३ मा पत्र पठाएका थियौं ’ एन्फाका कार्यवहाक प्रवक्ता समेत रहेका सह महासचिव सञ्जिव मिश्रले भने, ‘त्यसपछि फिफाको कुनै पत्र प्राप्त भएको छैन । हामीले त्यसअघि नै यो बैठक तय गरिसकेकाले आज बस्न लागेका हौं । मुख्यतः निर्वाचनकै विषयमा छलफल हुनेछ । ’

राष्ट्रिय खेलकुद परिषद् (राखेप) ले निर्वाचन आयोगको स्वीकृति लिएर मात्र निर्वाचन गर्न भनेपछि एन्फाले त्यहि अनुरुप प्रक्रिया अघि बढाएको थियो । निर्वाचन आचारसंहिताका आधारमा निर्वाचनका लागि सहमति दिन नसकिने बताएपछि एन्फाले जिल्ला र केन्द्रको नयाँ मिति तय गर्दै स्वीकृतिका लागि फिफामा पत्रचार गरेको बताएको थियो ।

‘हामीलाई निर्वाचन गर्न पाइन्न भनिएन । निर्वाचनका लागि सहमति दिन नसकिने भनेपछि हामीले निर्वाचन सार्ने प्रस्ताव अघि बढाएका हौं ’ कार्यवहाक प्रवक्ता मिश्रले भने, ‘फिफाको जवाफ आउने वित्तिकै हामी प्रक्रियामा अघि बढ्नेछौं ।’ एन्फाले नयाँ मिति अनुसार पुस ५ देखि माघ ५ गते सम्म जिल्ला र चैत १४ गतेका लागि केन्द्रिय कार्यसमितिको निर्वाचन प्रस्ताव गरेको छ ।

यसअघि असोज २३ गतेको विशेष साधारण सभाको म्यान्डेड अनुसार कात्तिक ६ गतेको कार्यसमिति बैठकले कात्र्तिक २५ देखि मंसिर २५ गते सम्म जिल्ला निर्वाचन र माघ ११ गतेलाई केन्द्रिय निर्वाचन तय गरेको थियो ।

रुस्लान थ्री स्टारले अझै क्षर्तिपूर्ति पाएन

एन्फाले सहमति बमोजिमको १ करोड ५० लाख रुपैयाँ क्षतिपूर्ति रुस्लान थ्री स्टार क्लबलाई अझै उपलब्ध नगराएको क्लबका कार्यवहाक अध्यक्ष अरुणमान जोशीले बताएका छन् । असोज १८ गते राखेप का सदस्य सचिव केशवकुमार विष्टको रोहवरमा क्षतिपूर्ति दिने सहमति र असोज २३ गते बसेको एन्फा विशेष साधारण सभाले त्यसलाई अनुमोदन गरेपनि त्यसको कार्यान्वयन भने हुन सकेको छैन । एन्फाले तीन किस्तामा मंसिर १० गते भित्र थ्री स्टारलाई क्षतिपूर्ति दिने गरि सहमति गरेको थियो ।

एन्फाका कार्यावहाक प्रवक्ता मिश्रले क्षतिपूर्ति दिन चाहेर पनि आर्थिक अभावका कारण दिन नसकेको बताएका छन् । ‘हामीले मुख्यतः प्रायोजकबाट प्राप्त हुने रकमबाट क्षतिपूर्ति दिने योजना बनाएका थियौं ’ मिश्रले भने, ‘तर, त्यसअनुरुप कार्यान्वयन हुन सकेन । हामी जत्ति सक्दो क्षतिपूर्ति उपलब्ध गराउन प्रयास गर्नेछौं ।’

एन्फाको गल्तिका कारण थ्री स्टारले पहिलो चरण छनोट भएर पनि एएफसी कपको दोस्रो चरण खेल्न पाएको थिएन । त्यसको विरोधमा थ्री स्टारले ६ करोड क्षतिपूर्ति, दोषीमाथि कारवाहीको माग गरेको थियो । माग पुरा नहुँदा सम्म थ्री स्टारले एन्फाको कुनै पनि कार्यक्रममा भाग नलिने निर्णय सार्वजनिक गरेको थियो ।