भिल्लारियल (एजेन्सी) – स्पेनिश ला लिगामा आज अग्रस्थानमा रहेको बार्सिलोना छैठौंमा रहेको भिलारियलको सामना गर्दै छ । भिल्लारियलको घरेलु मैदानमा खेलिने सो खेल नेपाली समयअनुसार १.३० बजे सुरु हुने छ ।
बार्सिलोनाका लागि जाभियर मासेरानो र आन्द्रेस इनिएस्टा घाइते रहेका छन् । त्यसैले उनीहरुको स्थानमा थोमस भर्मेलिन र सर्जी रोबर्टो खेल्ने सम्भावना रहेको छ । त्यस्तै मिडफिल्डमा पाको अल्कासेर र आन्द्रे गोमेजमध्ये एकजनाले स्थान पाउने देखिन्छ ।
घरेलु टोलीका लागि भने भिक्टर रुइज र जौमे कोस्टा टोलीमा फर्किँदै छन् । १४ खेलमा भिल्लारियलको २१ अंक रहेको छ र आफ्ना पछिल्ला दुई लिग खेल हारेको पनि छ ।
अर्को तर्फ बार्सिलोना यस सिजन लिगमा अपराजित छ । आज जित हांसिल गर्दै बार्सिलोना पुन: अग्रस्थानमा ५ अंकले अगाडि जान सक्ने छ । भिल्लारियलसँग बार्सिलोनाले पछिल्लो १८ खेलमा हार बेहोरेको छैन ।
