म्यानचेस्टर (एजेन्सी) – प्रिमियर लिगमा गए राति म्यानचेस्टर सिटीले प्रतिद्वन्दि म्यानचेस्टर युनाइटेडलाई २-१ ले हरायो । तर सो जितमा टोलीका कप्तान भिन्सेन्ट कम्पनी फेरि घाइते हुने पुगे ।
चोटबाट फर्किएका कम्पनीलाई हिजोको खेलमा हाफ टाइममा परिवर्तन गरिएको थियो । दुई वर्ष देखि विभिन्न चोटहरुसँग जुधिरहेका कम्पनी फेरि लामो समयका लागि घाइते भएको अनुमान गरिएको छ ।
खेलपछिको पत्रकार सम्मेलनमा बोल्दै म्यानचेस्टर सिटीका प्रशिक्षक पेप ग्वार्डिओलाले कम्पनी घाइते भएको बताए । ‘उनी घाइते भएका छन् । केहि समयदेखि यस्तै भइरहेको छ । चोटको बारेमा मलाई अझै जानकारी त आएको छैन । तर लाग्छ धेरै समयका लागि हामीले उनको भर पर्न मिल्दैन ।’
कम्पनी साथै पेपका लागि अन्य डिफेन्डर जोन स्टोन्स र बेन्जामिन मेन्डि पनि घाइते छन् । हिजोको खेलमा मिडफिल्डर फर्नान्डिनोले डिफेन्समा कम्पनीको स्थान लिएका थिए ।
हिजोको नतिजासँगै म्यानचेस्टर सिटी प्रिमियर लिगको अंकतालिकको शीर्ष स्थानमा ११ अंकले अगाडि रहेको छ । १६ खेलमा सिटीको ४६ अंक छ भने दोस्रोमा रहेको युनाइटेडको ३५ अंक रहेको छ ।
