काठमाडौं (हाम्रो खेलकुद)– सेन्ट जेभियर्स स्कुल गोदावरीको आयोजनामा आज सुरु भएको २२ औं फादर मोरान मेमोरियल आमन्त्रण फुटबल प्रतियोगितामा ललितपुरको लिटिल एन्जल्स, आयोजकको ए टोली र नेपाल डन बस्को स्कुल विजयी भएका छन् ।
पहिलो खेलमा लिटिल एन्जल्सले सेन्ट जेभियर्स जावलाखेल एलाई ४–३ ले हराएको छ । विजयी टोलीका लागि भारगव सिलवालले २ तथा सम्राट तन्डुकार र सक्षम विक्रम साउदले समान १ गोल गरे । सेन्ट जेभियर्सका लागि आभार सम्राट हाडाले २ र आशुतोष यादवले १ गोल गरे । लिटिल एन्जल्सका भारगव खेलको म्यान अफ दी म्याच चुनिए ।
आयोजक सेन्ट जेभियर्स गोदावरीको ए टिमले ललिपतपुर बाडेगाँउको ज्वालादेवी विद्यामन्दिर ४–१ ले हरायो । आयोजका लागि सबल महर्जनले २, प्रनव सिलवाल र सानसङ बुढाले समान १ गोल गरे । ज्वालादेवीका सोनम पहरीले एक गोल फर्काए । आयोजकका सबल खेलेको म्यान अफ दी म्याच घोषित भए ।
ललितपुर लुभूको नेपाल डन बोस्कोले सेन्ट जेभियर्स जावलाखेलको बी टोलीलाई ३–० ले हरायो । जसमा निश्चल केसीले २ र अमोग अवालेले १ गोल गरे । नेपाल जेसुइत संस्थाका बोनिफेस टिगा र आयोजक स्कुलका प्रिन्सिपल सामुइल मिमिकले रेफ्रीलाई बल हस्तान्तरण गर्दै प्रतियोगिताको उद्घाटन गरेका थिए । कम टुगेदर प्ले टुगेदर भन्ने नाराका साथ सुरु भएको प्रतियोगितामा १५ टोलीको सहभागिता रहेको छ ।
