कोलकाता (एजेन्सी) – विश्व फुटबलका महान् खेलाडि डिएगो म्याराडोनाले भारतको कोलकातामा आफ्नो मूर्ति उद्घाटन गरेका छन् । सो मूर्तिमा म्याराडोनाले विश्वकपको ट्रफी उचालिरहेका छन् ।
फुटबलप्रेमीहरुका लागि चिनिने कोलकाता सहरमा एक कार्यक्रमबीच हिजो म्याराडोनाले आफैंले आफ्नो मूर्ति उद्घाटन गरेका थिए । तर म्याराडोनाको अनुहारसँग मूर्ति मेल नखाएको भन्दै सामाजिक सञ्जाल ट्विटर र फेसबुकमा प्रशंसकहरुले आलोचना पनि गरेका छन् ।
कार्यक्रमबीच बोल्दै म्याराडोनाले भने, “म फुटबलको भग्वान् त होइन तर एक सामान्य फुटबलर हुँ । कोलकातामा फेरि आउँदा र आफ्नो मूर्ति पनि उद्घाटन गर्द पाउँदा म निकै खुसी छु ।”
५७ वर्षीय म्याराडोना आफ्नी प्रेमिका रोकियो ओलिभियासँग भारत भ्रमणमा छन् । उनले एघार क्यान्सर बिरामीलाई दश हजार भारु सहयोग पनि गरे । त्यस्तै कार्यक्रमअघि उनले नयाँ एम्बुलेन्सको उद्घाटन पनि गरेका थिए ।
