बेलबारी (हाम्रो खेलकुद)– ए डिभिजन क्लब लक्ष्मी हुन्डाई मनाङ मस्र्याङ्दी दोस्रो मनमोहन स्मृति दुवही गोल्ड कप फुटबल प्रतियोगिताको फाइनलमा पुगेको छ । दुवही रंगशालामा आज चर्च ब्वाइज युनाइटेडलाई १–० ले हराउँदै मनाङ उपाधि नजिक पुगेको हो ।
बल अघि बढाउँदै कप्तान अनिल गुरुङ (बायाँ) र सुजल श्रेष्ठ । फाइल तस्बिर
कप्तान अनिल गुरुङले खेलको अन्त्यतिर गरेको गोलमा मनाङ वर्षको चौथो नकआउट फुटबल प्रतियोगिताको फाइनल पुगेको हो । केहि साता अघि मात्र अन्तर्राष्ट्रिय फुटबलबाट सन्यास लिएका अनिलले ८० औं मिनेटमा गोल गरेका थिए । खेलमा म्यान अफ दी म्याच घोषित भएका मनाङका हेमन गुरुङले ५ हजार रुपैयाँ प्राप्त गरे ।
मनाङले त्रिभुवन आर्मी क्लब वा अग्नी रुपन्देही ११ मध्ये एकसँग फाइनल खेल्नेछ । भदौमा चितवनमा जेसिज कप जितेको मनाङले पछिल्लो दुईवटा फाइनल भने हारेको थियो । गत यसै महिना एक साताको बीचमा झापामा सताक्षी गोल्ड कप र मेची नेत्रालय काकरभिट्टा गोल्ड कप दुवै फाइनलमा मनाङ विभागिय टोली आर्मीसँग पराजित भएको थियो ।
आर्मीले भने यो वर्ष तीन वटा उपाधि जितसकेको छ । झापामा दुई उपाधि जित्नुअघि आर्मीले विशाल स्मृति गोल्ड कप फुटबल प्रतियोगिताको उपाधि उचालेको थियो । दुवहीमा मनाङले आयोजक इलेभन एरोज क्लबलाई ५–२ ले हराउँदै अन्तिम चारको यात्रा तय गरेको थियो ।
राष्ट्रिय फुटबल टोलीका सदस्य विक्रम लामाको कप्तानीमा रहेको चर्च ब्वाइज मोफसलको बलियो टोली रमपम झापा ११ लाई टाइब्रेकरमा हराउँदै सेमिफाइनलमा पुगेको थियो । इलेभेन एरोज र मनमोहन स्मृति प्रतिष्ठानले संयुक्त रुपमा आयोजना गरेको प्रतियोगिताको विजेताले उपाधिसहित ४ लाख १ हजार रुपैयाँ प्राप्त गर्नेछ । प्रतियोगिताको अन्तिम सेमिफाइनलमा बिहिबार आर्मी र रुपन्देहीबीच प्रतिस्पर्धा हुनेछ ।
