काठमाडौं (हाम्रो खेलकुद)– आयोजक सेन्ट जेभियर्स स्कुल गोदावरी ‘ए’ २२ औं फादर मोरान मेमोरियल फुटबल प्रतियोगितामाको क्वार्टरफाइनलमा पुगेको छ । आज गोदावरी टौखेलको पुष्पान्जली माविलाई २–० ले हराउँदै सेन्ट जेभियर अघिल्लो चरण पुगेको हो ।
सेन्ट जेभियर्सका लागि दुवै गोल अभिनव विष्टले गरे । विजेता टोलीका सबल महर्जन खेलको म्यान अफ दी म्याच घोषित भएका थिए । लिग चरणका सबै तीन खेल जित्दै आयोजक ए टोली अघि बढेको हो । आज लिग चरणका अन्य खेलमा हात्तिबनको लिटिल एन्जेल्स स्कुल, गोदावरीको क्रेस्सेन्ट एकेडेमी अंग्रेजी स्कुल विजयी भएका छन् ।
लिटिल ऐन्जेल्सले धुलिखेलको काठमाडौं विश्व विद्यालय हाइ स्कुललाई ४–० ले हरायो । विजयी टोलल्का लागि भागर्व सिलवालले ह्याट्रिक गरे भने अर्को गोल लक्ष्य महर्जनले गरे । विजेता टोलीका श्रीश्य दवाडी म्यान अफ दी म्याच चुनिए । पुष्पक राईले २, शिव थापा मगर र मोहित तामाङले समान १ गोल गरेको खेलमा क्रेस्सेन्टले ललितपुरको जेम्स स्कुललाई ४–० ले पराजित गर्यो । क्रेस्सेन्टका मोहित खेलको म्यान अफ दी म्याच घोषित भए ।
दिनको अन्तिम खेलमा आयोजकको बी टिम र जावलाखेल सेन्ट जेभियर्स स्कुलको बी टिमले २–२ बराबरी खेले । सेन्ट जेभियस गोदावरीका लागि रोज घलेले १ गोल भने अर्को आत्मघाती गोल भएको थियो । सेन्ट जेभियर्स जावलाखेलका लागि श्रीयश गुरुङ र विधान रेग्मीले गोल गरे । गोदावरीका लोयल घले म्यान अफ दी म्याच घोषित भए । गोदावरी र जावलाखेल दुवै बी टिमले यसअघिका दुई खेल गुमाएका कारण दुवै टोली अघिल्लो चरण पुग्न असफल रहे ।
