रेनेस (एजेन्सी) – फ्रान्सेली लिग १ को अग्रस्थानमा रहेको पेरिस सेन्ट जर्मन (पिएसजी) ले रेनेसलाई ४-१ ले हराएको छ । पिएसजीको जितमा नेयमारले दुई गोल गरेका थिए ।
खेलको सुरुवाती मिनेटमै पिएसजीले नेयमारको गोलमार्फत अग्रता लिन सफल भएको थियो । त्यस्तै खेलको १७ औं मिनेटमा किलियन बाप्पेले गोल गर्दै टोलीको अग्रता दोब्बर बनाएका थिए ।
दोस्रो हाफमा रेनेसले भने एक गोल फर्काउन सफल रह्यो । तर दुई मिनेटको अन्तरालमा एडिन्सन काभानी र नेयमारले ७५ औं र ७६ औं मिनेटमा गोल गर्दै टोलीको जित सुनिश्चित गरेका थिए ।
खेलको अन्त्य हुँदा दुवै टोलीको १० खेलाडि मात्र थिए । रेनेसका मिडफिल्डर बेन्जामिन आन्द्रेले ६३ औं मिनेटमा रातो कार्ड पाएका थिए भने खेलको अन्तिम मिनेटतिर पिएसजीका प्रेस्नेल किम्पेन्बेले रातो कार्ड पाउँदै मैदान छोडेका थिए ।
यस जितसँगै पिएसजी प्रतिद्वन्दि मोनाकोभन्दा ९ अंकले अगाडि छ । हारका बावजुद रेनेस भने अंकतालिकाको छैठौं स्थानमा यथावत् छ ।
