पोखरा (हाम्रो खेलकुद)– पोखरामा जारी १६ औं आहा रारा गोल्ड कप फुटबल प्रतियोगिताको क्वार्टरफाइनलमा नेपाल पुलिस क्लबसँग स्तब्ध भएपछि लक्ष्मी हुन्डाई मनाङ मस्र्याङ्दी क्लबका प्रशिक्षक छिरिङ लोप्साङले विदेशी खेलाडी खेलाउन नपाउनुकै कारण टोली पराजित भएको बताएका छन् ।
मनाङका चार विदेशी खेलाडीको वर्कपरमिटको म्याद सकिएका कारण मंगलबार पुलिसविरुद्ध खेलाउन पाएन । सोमबार रुस्लान थ्री स्टार क्लबले पनि त्यहि कारण दुई विदेशीलाई खेलाउन पाएन ।

‘चार मुख्य खेलाडी खेलाउन नपनाए पछि हामीले राम्रो खेल्न सकेनौ ‘, प्रशिक्षक लोप्साङले भने ,’ पछिल्लो तीन चार वर्षदेखि रक्षापक्तिमा हामी विदेशी खेलाडकिो भरमा थियौं । अर्को तिर हामीले पहिलो हाफ अलि हल्का रुपमा खेल्यौं । पुलिसले मेहनत गरेर खेल्यो । जसको कारण यस्तो परिणाम आयो ।’
लोप्साङले फुटबलमा हार जितलाई स्वभाविक मानेका छन् । उनले थपे, ‘फुटबलमा ब्राजिल जस्तो देशले त ७ गोल खान्छ भने मनाङ हार्दा आश्चार्य मान्नु पर्ने केहि छैन । ‘
पुलिसका प्रशिक्षक अनन्त थापाले आफुले बनाएको योजना अनुरुप खेलाडीले प्रदर्शन गरेपछि नतिजा आएको बताए । उनले भने, ‘खेलाडीलाई दिएको भूमिका राम्रोसँगले निर्वाह गरेपछि जित्न सफल भयौं ।’

मनाङ प्रशिक्षक छिरिङ लोप्साङ

पुलिस प्रशिक्षक अनन्त थापा