दिपक बोहोरा
पाँचथर– दोश्रो पाँचथर गोल्डकप प्रतियोगितामा मिसन युनाइटेड ताप्लेजुङले विजयी सुरुवात गरेको छ । फिदिम माविको मैदानमा भएको उद्घाटन खेलमा आयोजक पाँचथर क्लबलाई २–१ गोलले हराउदै मिसन युनाइटेड सेमिफाइनलमा पुगेको छ ।

मिसनका लागि दीपेश आङबुहाङ र युवराज लिम्बुले गोल गरे । आयोजक टोलीका लागि सुदीप श्रेष्ठले गोल गरे । खेलको १० औं मिनेटमा सुदीपको गोलबाट आयोजकले अग्रता लिएको थियो । विपक्षी तीन रक्षकलाई कटाउँदै सुदीपले गोल गरेका थिए ।

३१ औं मिनेटमा मिसनका दीपेशले गोल गर्दै खेललाई बराबरीमा पुर्याए । कमजोर रक्षापक्तिको फाइदा उठाउदै दीपेशले गोल गरेका हुन् । ६९ औं मिनेटमा युवराजले गरेको गोल खेलको निर्णायक बन्यो । पेनाल्टी बक्स नजिक दीपेशले प्रहार गरेको फ्रिकिकबाट युवराजले गोल गरेका हुन् ।

पहिलो हाफमा आयोजकले मिसन युनाइटेडलाइ दबाबमा राखे पनि दोश्रो हाफमा त्यसलाई निरन्तरता दिन नसक्दा पराजित भयो । आयोजक टोलीका सुदीप म्यान अफ दी म्याच घोषित भए र उनले ५ हजार रुपैयाँ प्राप्त गरे ।

सुरुआती अग्रता जोगाउन नसक्नु र दोस्रो हाफमा उच्च प्रदर्शन गर्न नसक्नुनै हारको कारण भएको पाँचथर क्लबका प्रशिक्षक नवीन बुढाथोकिले बताए । मिसनका प्रशिक्षक डिके मादेनले दोस्रो हाफको उच्च प्रदर्शनकै कारण सफलता मिलेको बताए ।

पाँचथर गोल्डकप नाइन ए साइड फुटबल प्रतियोगिताको विजेताले ३ लाख ५ हजार ५ सय ५५ र दोस्रो हुने टोलीले १ लाख ५५ हजार ५ सय ५५ रुपैया प्राप्त गर्ने छन । प्रतियोगिताका सर्वोत्कृष्ट खेलाडीले मोटरसाइकल प्राप्त गर्नेछन् ।

पाँचथर गोल्डपमा सोमबारको खेल
डिएफसि मोरङ विरुद्ध रेडहर्स इलाम