ब्यूनर्स आयर्स (एजेन्सी)– रसिया विश्व कपका लागि २३ खेलाडीको घोषणा भएयता अर्जेन्टिनी टोलीले पहिलो पटक सँगै अभ्यास गरेको छ । हाइटीसँग अर्को साता मैत्रीपूर्ण खेल खेल्ने तयारीमा रहेको अर्जेन्टिनाले मंगलबार अभ्यास गरेको हो ।

अभ्यासमा लियोनल मेस्सीसहित सबै सामेल भएका थिए । हाइटीसँगको खेलपछि अर्जेन्टिना टोली विश्व कप फुटबलको तयारीका लागि बार्सिलोना पुग्नेछ । टोलीका खेलाडीले सामान्य दौड, पासलगायतको अभ्यास गरेका थिए ।

अभ्यासमा मेस्सी तनावमुक्त देखिन्थे । खल्तीमा हात हालेर उनी प्रशिक्षण टोलीसँग गफ गरिरहेको देखिन्थे । अर्जेन्टिनालाई यसपटक पनि दाबेदारका रुपमा हेरिएको छ । सन् २०१४ को विश्व कप फाइनलमा अर्जेन्टिना जर्मनीसँग पराजित भएको थियो ।

परिचित अर्जेन्टिनी टोलीका खेलाडी सर्जियो अगुएरो पनि प्रशिक्षणमा सामेल थिए । म्यानुयल लान्जिनी, निक्लास ओटामेन्डी मार्कोस रोहो लगायत प्रिमियर लिग खेलाडी अर्जेन्टिनाको टोलीमा रहेका छन् । आक्रमणपंक्तिमा झनै बलियो देखिएको अर्जेन्टिनाले यस सिजन २९ गोल गरेका मौरो इकार्डीलाई भने अन्तिम टोलीमा सामेल गरेको छैन ।

विश्व कपमा समूह डीमा रहेको अर्जेन्टिनाले आइसल्यान्ड, कोस्टारिका र नाइजेरियको सामना गर्नेछ । जुन १६ मा आइसल्यान्डसँग खेल्दै अर्जेन्टिनाले विश्व कपको यात्रा सुरु गर्नेछ ।