लन्डन (एजेन्सी) – विश्वकप २०१८ सुरु हुन अब केवल १६ दिन बाकीं रहंदा सबैले आफ्नो विजेता अनुमान लगाउनु स्वभाविक नै हो । त्यस्तै विभिन्न प्रविधि र तथ्याङ्कहरुको सहयोगमा विश्वकै प्रतिष्ठित भिडियो गेम फिफाले प्रतियोगिता फ्रान्सले जित्ने भविष्यवाणी गरेको छ ।

अघिल्लो विश्वकपमा फिफाले जर्मनीले नै जित्ने अनुमान गरेको थियो । फिफाका केही अनुमानहरु यस प्रकारका रहेका छन्:

समूह चरण:
समूह चरणमा फिफाको अनुमानमा आयोजक रुस इजिप्टलाई हराउंदै अन्तिम १६ मा समूह विजेता उरुग्वेसँगै प्रवेश गर्ने छ । त्यस्तै अर्जेन्टिना आफ्नो समूहमा दोस्रो हुने र स्विडेनले मेक्सिकोलाई गोलअन्तरमा हराउंदै अन्तिम १६ मा पुग्ने अनुमान पनि फिफाले गरेको छ ।

अन्तिम १६:
अन्तिम १६ मा क्रिस्टियानो रोनाल्डो र लियोनल मेस्सी सम्मिलित टोलीहरु बाहिरिने अनुमान गरिएको छ । पोर्चुगल उरुग्वेसँग हार्नेछ भने अर्जेन्टिना फ्रान्ससँग पराजित हुने छ । त्यस्तै इंग्ल्यान्ड पनि कोलम्बिया विरुद्ध पेनाल्टीमा परजित हुने अनुमान गरिएको छ ।

क्वाटरफाइनल:
क्वाटरफाइनलमा ब्राजिल बेल्जियमसँग २-० ले पराजित हुने ठुलो अनुमान लगाइएको छ । त्यसैगरी स्पेन, फ्रान्स र जर्मनीले क्रमश: क्रोएसिया, उरुग्वे र कोलबियालाई हराउने भविष्यवाणी फिफाले सार्वजनिक गरेको छ ।

सेमिफाइनल:
सेमिफाइनलमा बेल्जियम फ्रान्सँग पराजित हुने र अर्को तर्फ स्पेन जर्मनीविरुद्ध पराजित हुने अनुमान लगाइएको छ ।

फाइनल:
फाइनलमा जर्मनी र फ्रान्स भिड्दा दुवै टोलीले नियमित समयमा १-१ गोल गर्ने अनुमान गरिएको छ । त्यस्तै पेनाल्टी सुट-आउटमा भने फ्रान्सले जर्मनीलाई ४-३ ले हराउंदै २२ वर्षमा पहिलो पटक विश्वकप उचाल्ने अनुमान गरिएको छ ।

तपाईंको अनुमानमा भने विश्वकप कस्ले जित्ला?