म्याड्रिड (एजेन्सी) – रियल म्याड्रिड विश्वकै सबैभन्दा उत्कृष्ट क्लब मध्य एक हो भन्नेमा दुईमत छैन । विश्वका धेरै महान फुटबल खेलाडीले यस क्लबबाट खेलेका छन् ।

घरेलु प्रतियोगितामा रियलले ६४ उपाधि जितेको छ जसमा ३३ लिग उपाधि सेमत समावेश छन् । युरोपियन इतिहासमा रियलले २५ उपाधि हात पार्दा १३ पटक युरोपियन कप र च्याम्पियन्स लिगको उपाधि बिजेता बनेको छ । सन् २००० डिसेम्बर ११ मा रियल म्याड्रिडलाई २० औं शताब्दिको उत्कृष्ट कल्ब घोषित गरिएको थियो ।

त्यसयताको १० बर्षमा भने रियलले मात्र ३ पटक ला लिग उपाधि उचालेको छ । लिग टाइटल जित्न नसक्नु रियलका लागि पछिल्लो केहि वर्ष चिन्ताको विषय बनेको छ । रियल म्याड्रिडको चिर परिचित प्रतिद्वन्द्वी बार्सिलोनाले भने पछिल्लो केहि बर्षमा इनिएस्टा, मेस्सी, जाभी र अन्य खेलाडीहरुको प्रेरणामा लगातार सफलता हात पारेको छ ।

यी हुनसक्छन् ५ कारण जसले गर्दा रियलले ला लिगा २०१८/१९ नजित्न सक्छ :

५) रोनाल्डोको अभाव

सन् २००९ मा त्यस समयको महँगो मूल्य चुकाएर क्रिस्टियानो रोनाल्डोलाई टोलीमा भित्राएको रियलले रोनाल्डोकै सहयोगमा २ ला-लिगा उपाधि, २ कोपा डेल रे उपाधि र ४ पटक च्याम्पियन्स लिगको उपाधि हात पार्न सफल भयो । रोनाल्डो रियलमा रहँदासम्म उनि क्लबका सबैभन्दा उत्कृष्ट खेलाडी रहेका थिए ।

रियलको नाम रोनाल्डोसँग जोडिएर मात्र आउने गर्दथ्यो । अहिलेभने रोनाल्डोले जुभेन्टसमा आबद्ध हुन् रियल छाडेका छन् । रियलको उपाधिमा यात्रामा रोनाल्डोको अभाव पक्कै खड्किने छ ।

४) जुलेन लोपेटेगुई

सन् २०१८ विश्वकप सुरुहुन अघि रियलले पुर्व रियल म्याड्रिड तथा बार्सिलोनाका खेलाडी हुलेन लोपेटेगुईलाई प्रशिक्षकका रुपमा नियुक्त गर्यो । रियलमा आबद्ध भएकै कारण उनले स्पेनको राष्ट्रिय टोलीको व्यवस्थापकको भूमिकाबाट समेत हट्नु परेको थियो । उनको व्यवस्थापनमा कुनैपनि टोलीले जितेको सबैभन्दा ठुलो उपाधिनै यु-१९ र यु-२३ युरोपियन च्याम्पियनसिप मात्र हो । पोर्टोलाई च्याम्पियन्स लिगको क्वार्टरफाइनल पुर्याउन बाहेक उनले ठूलो क्लबमा रहेर खास केहि छाप छोड्न सकेका छैनन् ।

३) बेलको चोट र फर्म

सन् २०१३ सेप्टेम्बर १ मा टोटनह्यामबाट १०० मिलियन युरोमा रियल भित्रिएका बेलले टोटनह्याममा हुँदा पाएको सफलता र लयमा रियलमा पाउन सकेका छैनन् । यसको एउटा मात्र कारणको उनको चोट । च्याम्पियन्स लिग र अन्य लिगमा रियलका लागि धेरै गोल गरेपनि बेल रोनाल्डोको छायाँबाट माथि उठ्न सकेका छैनन् । यदि उनको स्थानमा रियलले अरुकुनै खेलाडी नलिने हो भने बेलमा अझ बोझ थपिने निश्चित छ ।

२) मजबुत प्रतिस्पर्धा

ला लिगमा रियल म्याड्रिडको प्रतिस्पर्धी बार्सिलोना र ए. म्याड्रिड मात्र हुन् । एटलेटिको म्याड्रिडले यस सिजन लेमार, रोड्री, क्यास्ट्रो, एडन र जेल्सन मार्टिन्सलाई भित्र्याएको छ । यस्तै बार्सिलोनाले भने माल्क्म, लेंग्लेट, अर्थर र एन्टोनियो भिडाललाई सामे गरेको छ । दुवै टोलीले आफ्नो मुख्य समस्यालाई समाधान गर्ने प्रयास गरेका छन् र पेपरमा दुवै टोलि रियलभन्दा बलियो देखिन्छन् ।

कोर्टुवा भिनिसियस र ओड्रीओजोलालाई टोलीमा ल्याउनका बाबजुद रियलको समस्या समाधान भएको देखीदैन । रियललाई अझ रक्षापंक्तिका खेलाडी र बेन्जिमालाई साथदिने अट्याकिंग खेलाडीको खाँचो छ ।

१) कम्जोर आक्रमण पंक्ति

रियल म्याड्रिडको नाममा कम्जोर आक्रमणलाई जोड्नु लज्जास्पद हुनजान्छ । टोलीमा इस्को, बेल, बेन्जिमा, एसेन्सियो, बोर्जा र भाज्क्वेज जस्ता खेलाडी भएपनि लामो समय चल्ने लिगमा उनीहरु धेरै गोल गर्न विफल रहेका छन् ।
सबै खेलाडीहरु छोटो समयको प्रतियोगिता जित्न माहिर छन् र ३८ खेल लामो लिगमा उनीहरुबाट लगातार गोल आएको छैन । रोनाल्डो टोलीमा रहँदा बेन्जिमाले आफ्नो शैली परिवर्तन गर्नु परेको थियो तर अब उनीमा गोल गर्ने अझ धेरै जिम्मेवारी बढेको छ ।