इस्टोनिया (एजेन्सी) – डिएगो कोस्टाले दुई गोल गरेपछि एटलेटिको म्याड्रिडले युईएफए सुपर कपमा रियल म्याड्रिडलाई ४-२ ले पराजित गरेको छ । निर्धारित ९० मिनेट २-२ को बराबरीमा सकिएपछि थपिएको ३० मिनेटमा एटलेटिकोले २ गोल थपेको थियो ।

खेल सुरु भएको ४९ सेकेन्डमै गोल गर्दै कोस्टाले एटलेटिकोलाई अग्रता दिलाएका थिए । तर करीम बेन्जेमाले २७ औं मिनेटमा गोल गर्दै खेल बराबरीमा ल्याए । उनले ग्यारेथ बेलको पासको सदुपयोग गर्दै फिनिसिङमा कुनै गल्ति गरेनन् ।

दोस्रो हाफको मध्येतिर रियलले पेनाल्टीको अवसर प्राप्त गर्यो । एटलेटिकोका डिफेन्डर जानफ्रानले पेनाल्टी क्षेत्रभित्र ह्याण्ड गरेपछि रेफ्रीले पेनाल्टी दिएका थिए । कप्तान सर्जियो रामोसले पेनाल्टीमा सहजै गोल गरे । खेल सकिन ११ मिनेट बाँकी छँदा कोस्टाले खेल पुन: बराबरीमा ल्याए ।

अतिरिक्त समयमा एटलेटिकोले दुई गोल गर्दै सिजनको पहिलो उपाधि जित्यो । साउल निगुएजले ९९ औं तथा त्यसको पाँच मिनेटपछि कोकेले गोल गर्दै रियललाई सिजनको पहिलो खेलमा पराजित गरे । क्रिस्टियानो रोनाल्डोको प्रस्थानसँगै आक्रमणमा केहि कमी भएपनि रियलले बेल, बेन्जेमा, इस्को लगायतका खेलाडीले त्यसको परिपूर्ति गर्ने अपेक्षा राखेको छ ।