ढाका (हाम्रो खेलकुद) – नेपाली राष्ट्रिय फुटबल टोलीका प्रशिक्षक बालगोपाल महर्जनले खेलाडीले लगातार गल्ती दोहोर्याउँदा प्रतियोगिताबाट बाहिरिनु परेको बताए । साफ च्याम्पियनसिप अन्तर्गत बुधबार भएको सेमिफाइनल खेलमा नेपाल माल्दिभ्ससँग ३-० ले पराजित हुँदै घर फर्किएको छ ।

नेपालले खेलको सुरुआतमै गोल खाएको थियो । कप्तान अक्रमको फ्रिकिक गोलमा पछाडी पारेको नेपाली टोलीले अन्तिम समयमा लगातार दुई गोल खाएको थियो । नेपाली टिमका कार्यवहाक मुख्य प्रशिक्षक बालगोपाल महर्जनले सोचे अनुसारको खेल्न नसक्दा पराजित हुन पुगेको बताए । ‘आज हामीले सोचे अनुसार खेल्न सकेनौं । सोचेजस्तो खेल्न नसकिरहेको अवस्थामा मौसमले पनि साथ दिएन ।’

खेलदौरान वर्षा भएपछि पहिलो हाफको बिचमा खेल रोक्नुपरेको थियो । वर्षासँगै चट्याङ परेपछि प्रतिकुल मौसमको कारण देखाउँदै खेल आधा घण्टापछि पुन: सुचारु भएको थियो । खेलपछि प्रशिक्षक महर्जनले पत्रकार सम्मेलनमा भने, ‘खेलाडीहरुले गल्ती माथि गल्ती गरिरहे । पहिलो गोल नै खेलको टर्निङ प्वाइन्ट बन्यो । माल्दिभ्सका खेलाडीले व्यक्तिगत रुपमा पनि राम्रो प्रदर्शन गरे । यो नै हाम्रो हारमा कारक बन्यो ।’ उनले यसअघिका खेलमा जस्तै वैकल्पिक खेलाडीले पनि राम्रो खेल्न नसकेको बताए ।