काठमाडौं (हाम्रो खेलकुद) – ए डिभिजन क्लब मनाङ मर्स्याङदी क्लबका मिडफिल्डर सुजल श्रेष्ठ हत्केलाको चोटका कारण ६ साता मैदानबाहिर रहने भएका छन् ।

बुधबार विहान प्रशिक्षणका क्रममा लड्दा चोट बोकेका उनले साँझ परिक्षण गर्दा हत्केलामा चोट देखिएपछि डाक्टरले ६ साता विश्राम गर्न भनेका हुन् । उनको हातमा प्लास्टर गरिएको छ । लिग अन्तर्गत पहिलो खेलमा मनाङको कप्तानी गर्दै ३-१ को जित दिलाएका सुजलले अब मनाङको महत्त्वपूर्ण खेलहरु गुमाउने छन् । मनाङले शनिबार हुने खेलमा न्यू रोड टिम (एनआरटि) र त्यसपछि थ्री स्टारको सामना गर्दैछ ।

सुजलले प्रशिक्षणका क्रममा हाम्रोखेलकुदसँग बोल्दै सिक्किममा गभर्नर्स गोल्डकप जितेपछि टोलीको मनोबल उच्च रहेको बताएका थिए । ‘ सिक्किममा हामीले उपाधि जितेपछि मनोबल उच्च रहेको छ । लिगको लागि पनि तिहार सकिएलगत्तै तयारी सुरु भएको छ । विदेशी प्रशिक्षकले हामीलाई राम्रोसँग तयार गर्नुभएको छ,’ सुजलले भने ।

आक्रमण निकै बलियो भएकाले मनाङले राम्रो प्रदर्शन गर्ने उनले बताए । ‘ हाम्रो आक्रमण तुलानाताम्क रुपमा बलियो छ । दुई विदेशी फरवार्डसँगै राष्ट्रिय टोलीका खेलाडी पनि टोलीमा छन् । हामी आक्रमणमा विश्वस्त छौं,’ उनले थपे, ‘ लिगमा सबै खेल महत्त्वपूर्ण हुन्छ । सानो टोलीले पनि समस्या दिन सक्छ । शनिबार एनआरटिविरुद्ध जित दर्ता गरेपछि थ्रीस्टारका लागि विशेष योजना लिएर अगाडी बढ्छौं ।’

लिगको साविक विजेता समेत रहेको मनाङले सोमबारमात्र मिडफिल्डर प्रकाश बुढाथोकीलाई भित्र्याएको थियो । आक्रमणमा अनुभवी दिपक राई, अन्जन विष्ट, ओलावाले आफिज, अडेलाजासँगै मिडफिल्डर विशाल राई र हेमन गुरुङले मनाङ उपाधिको बलियो दावेदारको रुपमा दरिएको छ ।