काठमाडौं (हाम्रो खेलकुद) – राष्ट्रिय टोलीका मिडफिल्डर एवं रुस्लान थ्री स्टार क्लबका कप्तान विक्रम लामाले ९ महिनापछि मैदानमा पुनरागमन गरे । प्रशिक्षक मेघराज केसीका अनुसार यो पुनरागमन सफल हुनुमा विक्रमको मिहिनेत र क्लबको साथ नै मुख्य कारक हो ।

ब्रिगेड ब्वाइजविरुद्ध लिगको दोस्रो खेलमा थ्री स्टारले ५-१ को जित दर्ता गर्दा विक्रमले अन्तिम गोल गरे । नियमित मिडफिल्ड पोजिसनबाट तल झरेर सेन्टर डिफेन्सको भूमिका निर्वाह गरेका विक्रमले एकदम राम्रो प्रदर्शन गरेको प्रशिक्षक मेघराज केसीले बताए । ‘उनलाई हामीले टिमको कमजोर रहेको स्थानमा खेलाएको हो । उनले आफ्नो पोजिसन भन्दा बाहिर साँच्चै राम्रो खेले । हामी उनलाई आवश्यकता अनुसार खेलाउने छौं ।’ प्रशिक्षक केसीले थपे, ‘ आधुनिक फुटबलमा एकै पोजिसन मात्र खेल्न सक्ने खेलाडी कमजोर हुन्छ । विक्रम टोलीका कप्तान हुन् र उनलाई बाहिर राख्न सकिन्न । उनले आज पनि राम्रो प्रदर्शन गरे ।’

प्रशिक्षक केसीले विक्रमको सफल पुनरागमनको सम्पूर्ण श्रेय विक्रमको मिहिनेत र क्लबको साथलाई दिए । ‘ मैले यकिन भन्न सक्दिन । मेरो अन्दाजमा क्लबले आर्थिक रुपमा सरदार १० लाख खर्च गरेको छ । विक्रम आफैंले पनि जुन प्रकारको मिहिनेत गरे, त्यो महत्त्वपूर्ण थियो । मानसिक रुपमा उनलाई तयार पार्न र खेलतर्फ केन्द्रित गर्न हामीले विभिन्न कार्य गरेका थियौं ,’ केसीले थपे ।

केसीले झन्डै डेढ महिनाको विश्रामपछि पनि थ्री स्टाले राम्रो खेल्दा जित हात पार्न सकिएको बताए । ‘बीबीसीले हामी विरुद्ध राम्रो खेल्यौं । हामीले उनीहरुले भन्दा राम्रो खेल्यौं । युवा खेलाडीले भरिएको बीबीसीले हामीसँग डोमिनेट भएर खेलेन,’ उनले भने, ‘हामीले पनि बीबीसीलाई कमजोर टिमको रुपमा खेलेनौं । स्कोरले मात्रै खेलको कथा भन्दैन । खेलले नै खेलको कथा भन्ने हो । आज त्यही भयो ।’

प्रशिक्षक केसीले आउने खेलमा पनि जितको सिलसिला कायम राख्ने बताए । ‘विपक्षीलाई विपक्षीकै रुपमा सोच्ने, मिहेनत गरेर खेल्ने । आगमी खेलमा बढी शक्ति लगाएर खेल्ने । सबै टोली बराबरी छन् । को बलियो को कमजोर भनेर सोच्न जरुरी छैन,’ उनले टुंग्याए ।

पराजित टोली बीबीसीका प्रशिक्षक उज्जन श्रेष्ठले थ्री स्टारविरुद्ध राम्रो खेलेको बताए । ‘सुरुमा अनावश्यक पेनाल्टीले नै टिममा दबाबमा पर्यो । दोस्रो हाफमा गोल गर्ने रणनीतिमा खेल्दा झनै गोल खान पुग्यौं । पक्कै पनि थ्री स्टारलाई हामीविरुद्ध खेल्न सहज भएन । हामीले तिहारपछि जम्मा ४ दिन प्रशिक्षण गरेका थियौं । खेल ७५ मिनेटसम्म राम्रो भएको थियो । त्यसपछि राम्रो भएन,’ प्रशिक्षक उर्जन श्रेष्ठले भने ।

विदेशी खेलाडीले खेल्न नसकेपनि उनले आगमी खेलमा कमजोरीहरु सुधार्दै लैजाने बताए । ‘हामीले विदेशी खेलाडीबाट आज अपेक्षित प्रदर्शन पाएनौं । बलियो दुई टोली मनाङ र थ्री स्टारसँग खेलिसकेका छौं । अझै ११ खेल बाँकी छ । राम्रो खेल्ने प्रयास गर्नेछौं,’ श्रेष्ठले टुंग्याए ।