ग्लास्गो (एजेन्सी) – जेम्स फरेस्टले ह्याट्रिक पुरा गरेपछि स्कटल्यान्डले इजरायलमाथि रोमाञ्चक जित निकालेको छ । ह्याम्पडेन पार्क ग्लास्गोमा मंगलबार राति भएको युइएफए नेसन्स लिग फुटबलमा स्कटल्यान्डले इजरायलमाथि ३–२ को रोमाञ्चक जित निकालेको हो ।

पराजित टिमका लागि वेराम कायल र इरान जाहभीले गोल गरे । इजरायलले वेरामको गोलबाट खेलको नवौं मिनेटमा शुरुवाती अग्रता बनाएको थियो । ३४औं मिनेटमा जेम्स फरेस्टले गोल गर्दै खेललाई १–१ गोलको बराबरीमा ल्याएका थिए । रायन क्रिस्टिको पासमा जेम्सले ४३औं मिनेटमा गोल गरेपछि स्कटल्यान्डले पहिलो हाफमा २–१ को अग्रता लिन सफल भएको थियो ।

६४औं मिनेटमा फरेस्टले रायन फ्रासरको पासमा अर्काे गोल गर्दै ह्याट्रिक पूरा गरेपछि स्कटल्यान्डले खेलमा ३–१ को अग्रता बनाएको थियो । ७५औं मिनेटमा इरान जाहभीले गोल गर्दै खेललाई ३–२ को अवस्थामा ल्याएका थिए । त्यसपछि थप गोल निस्कन नसक्दा स्कटल्यान्डले ३–२ को जित निकाल्न सफल भयो ।

जितपछि स्कटल्यान्डले नेसन्स लिगका दोस्रो चरणमा स्थान बनाउनुका साथै सन् २०२० को युरोकपको लागि प्ले अफमा स्थान बनाउन सफल भयो ।

मंगलबार राति नै भएको नेसन्स लिग सी को समूह ४ को खेलमा सर्वियाले लिथुनियालाई ४–१ को फराकिलो अन्तरले पराजित गर्दै समूहको शीर्ष स्थानमा रहँदै दोस्रो चरणको लागि स्थान बनाउन सफल भयो । सर्वियाको जितमा एलेसान्द्रो मिट्रोभिकले दुई तथा एडेम लेजाजिकले एक गोल गर्दा अर्काे गोल उपहार पाएको थियो । लिथुनियाका डिमान्थस पेट्राभिसियले एक गोल फर्र्काएका थिए ।

यो समूहमा सर्वियाले ६ खेलबाट १४ अंक जोड्न सफल भयो । हारसँगै लिथुनिया रेलिगेसनमा पर्यो । यही समूहको अर्काे खेलमा रोमानियाले मोन्टेनेग्रोलाई १–० ले पराजित गर्यो ।