काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत तेस्रो चरणको खेल आज सुरु हुँदैछ । बिहीबार हुने पहिलो खेलमा भ्याली च्यासल युवा क्लबले न्यू रोड टिम (एनआरटी) को सामना गर्दैछ ।

लिगको दोस्रो चरणको समाप्तिमा दुवै टोलीले १-१ अंक जोडेका छन् । च्यासलले पहिलो खेलमा मछिन्द्रसँग गोलरहित बराबरी खेलेको थियो भने दोस्रो खेलमा त्रिभुवन आर्मीसँग १-० ले पराजित भएको थियो । एनआरटीले भने पहिलो खेलमा आर्मीसँग २-२ को बराबरी खेल्दै दोस्रोमा मनाङसँग २-० ले पराजित भयो ।

उपाधि होडमा आउने सम्भावना बोकेको च्यासलले दावेदारीलाई सार्थकता दिने हो भने आजको खेल जित्नेपर्ने दबाब छ । प्रशिक्षक राजुकाजी शाक्य पनि अब टोलीले एकाग्रता पाएसँगै नतिजा आउनेमा आशावादी छन् । ‘ हामीले पहिलो खेलमा अंक गुमायौं । टिम सेट नभएकाले केहि समस्या थियो । आर्मीविरुद्ध राम्रो खेल्दाखेल्दै पनि पराजित भयौं । राइनो गोल्डकप खेल्दाको थकानले पनि त्यो भएको थियो । अब हामी तयार छौं । भोली तीन अंक महत्त्वपूर्ण छ,’ उनले भने ।

सन्तोष साहुखलको आगमनले पनि टोलीलाई फाइदा पुगेको प्रशिक्षक शाक्यको बुझाई छ । ‘उनले पहिलो खेलमा आएकै भोलिपल्ट मैदान उत्रिए । राम्रो प्रदर्शन नै गरे । गोल निस्कन सकेन । पछिल्लो केहि दिन सँगै प्रशिक्षण गरेका छौं । विमल पनि टोलीसँगै छ । राम्रो प्रदर्शनको आशा राखेको छु । टोलीमा विदेशी डिफेन्डर पनि थपिएका छन्,’ उनले भने । च्यासलले मनाङको पूर्व खेलाडी फ्लोरेन्टलाई अनुबन्धन गरेको छ ।

राष्ट्रिय टोलीका डिफेन्डर देवेन्द्र तामाङको कप्तानीमा रहेको च्यासलमा विमल घर्तिमगर, सन्तोष साहुखल, हेमन्त थापामगरलगायत नाम चलेका खेलाडी छन् । उमेर समूहको अनुभव बोकेका अमिर श्रेष्ठ, दिनेश थापामगर, गौरव बुढाथोकीले टोलीलाई थप मजबुत बनाएको छ ।