काठमाडौं (हाम्रो खेलकुद) – उपाधिको दावेदार दुई विभागीय टोली आयोजक त्रिभुवन आर्मी क्लब र एपीएफले राजधानीमा जारी प्रधानसेनापति छैटौं अन्तर्राष्ट्रिय महिला फुटबल प्रतियोगितामा फराकिलो जित दर्ता गरेको छ ।

सैनिक शारीरिक तालिम केन्द्र लगनखेलस्थित खेल मैदानमा शुक्रबार भएको खेलमा एपीएफले प्रदेश नम्वर ३ माथि १०–० को फराकिलो जित निकालेको हो । एपीएफको जितमा फरवार्ड सावित्रा भण्डारी एक्लैले खेलमा ५ गोल गरिन् । सरु लिम्बू, अनु लामा, रेखा पौडेल, मंजु दोङ र रेनुका नगरकोटेले १-१ गोल गरे । खेलको प्लेअर अफ द म्याच सावित्रा भइन ।

शुक्रबारै भएको अर्काे खेलमा आयोजक त्रिभुवन आर्मी क्लबले प्रदेश नम्वर ७ माथि ८–० को फराकिलो जित दर्ता गर्यो । आर्मीको जितमा कृष्णा  खत्रीले ५ गोल गरिन् । दीपा राईले २ गोल गर्दा विमला चौधरीले १ गोल गरिन् । खेलमा उत्कृष्ट प्रदर्शन गरेकी कृष्णा खत्री प्लेअर अफ द म्याच घोषित भइन ।

यसअघि बिहिबार प्रदेश नम्वर २ ले प्रदेश ५ माथि ८–० को तथा नेपाल पुलिस क्लबले प्रदेश ६ माथि १०–० को फराकिलो जित निकालेको थियो । प्रदेश ५ की दिल कुमारी राना मगर र पुलिस क्लबकी निरु थापा ‘वुमन अफ दि म्याच’ घोषित भए ।

प्रतियोगिता अन्तर्गत शनिबार भारतको विहार र प्रदेश २ बीच तथा नेपाल पुलिस क्लब र भारतको सिक्किमबीच खेल हुनेछ ।