एजेन्सी – यस वर्षको बलोन डि’ओरको शीर्ष ३ मा विश्वका दुई उत्कृष्ट खेलाडी बार्सिलोनाका लियोनल मेसी र युभेन्टसका क्रिस्टियानो रोनाल्डो दुवै नपर्ने सम्भावना बढेको छ । विगत १० वर्षमा यस उपाधि मेसी र रोनाल्डोले ५-५ पटक जितेका छन् ।

इटाली र फ्रान्सका पत्रिकाहरुका अनुसार यस पटक डिसेम्बर ३ मा हुने बलोन डि’ओरको शीर्ष ३ मा मेसी र रोनाल्डो नपर्ने सम्भावना बलियो छ । शीर्ष ३ मा क्रोएसियाका लुका मोड्रिच तथा फ्रान्सका राफायल भरान र किलियन एम्बाप्पे हुने सम्भावना धेरै रहेको बताइएको छ ।

च्याम्पियन्स लिग विजेता तथा विश्वकप उपविजेता लुका मोड्रिचलाई प्रमुख दाबेदारका रुपमा हेरिएको छ । उनले अघिल्लो महिना ‘द बेस्ट’ खेलाडीको उपाधी पनि जितेका थिए ।

तर यस सिजन मोड्रिचले लिगमा सोचेअनुरुप प्रदर्शन नगरेकाले एम्बाप्पेको उपाधि जित्ने सम्भावना पनि रहेको छ । विश्वकपमा उत्कृष्ट युवा खेलाडी चुनिएका एम्बाप्पेले यस सिजन पनि निकै राम्रो सुरुवात गरेका छन् । ९ खेलमा एम्बाप्पेले ११ गोल र ४ असिस्ट गरिसकेका छन् ।

च्याम्पियन्स लिग र विश्वकप एकै सिजनमा जितेका भरान पनि बलियो दाबेदारका रुपमा हेरिएको छ । बलोन डि’ओरको ३०-खेलाडीको सुचीमा रहेका एडेन हाजार्डले हालसालै भनेका थिए, “विश्वकपपछी मोड्रिचले जित्नेमा पक्का थिएं, तर रियलको खराब लयले गर्दा विश्वकप जितेका र लयमा रहेका एम्बाप्पे अहिले बलियो देख्छु ।”

यस वर्षको बलोन डि’ओरको कस्ले जित्ला?