काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत शनिबार दुई खेल हुँदैछन् । पहिलो खेलमा हिमालयन शेर्पा क्लब र नेपाल पुलिस क्लब खेल्नेछन् । दोस्रो खेलमा सीएमजी क्लब संकटाले न्यू रोड टिम (एनआरटी) सँग खेल्नेछ ।

हिमालयन शेर्पा र पुलिस दुवै टोलीको समान १०-१० अंक रहेको छ । लिग उपाधि जित्ने लक्ष्य राखेको पुलिसका लागि यो खेल निकै महत्त्वपूर्ण रहेको छ । शेर्पाविरुद्ध पराजित भए पुलिसको उपाधि जित्ने सम्भावना गणितीय रुपमा मात्र सिमित रहनेछ । पुलिसमा चोटको समस्याले सोचेअनुरुप नतिजा आउन सकेको छैन । पछिल्लो खेलमा संकटासँग पराजित भएपछि प्रशिक्षक अनन्त थापाले आक्रमणमा खेलाडी घाइते हुनु नै दुर्भाग्य रहेको बताएका थिए । सुमन लामा, रेजिन सुब्बा र हेम तामाङ चोटका कारण खेल्न सकेका छैनन् ।

यता शेर्पाले शीर्ष ४ को लक्ष्य लिएर लिगमा आएको थियो । लिगमा उत्कृष्ट सुरुवात गरेको शेर्पा पछिल्लो दुई खेलमा भने पराजित भएको छ । च्यासलविरुद्ध अग्रता लिएर पनि शेर्पाले जित दर्ता गर्न नसक्दा यो खेल जित्नपर्ने अवस्था आएको छ । कर्ण लिम्बूले पछिल्लो दुई खेलमा गोल गर्न सकेका छैनन् ।

दोस्रो खेलमा सीएमजी क्लब संकटासँग शीर्ष स्थानमा उक्लने मौका हुनेछ । पुछारको एनआरटीले लिगमा अहिलेसम्म जित दर्ता गरेको छैन । डिफेन्समा कमजोर प्रदर्शन हुँदा एनआरटी पराजित हुँदै आएको छ । पछिल्लो खेलमा पनि एनआरटीले बलियो स्थितिमा रहँदा समेत खेल गुमाएको थियो ।

संकटा भने लिगमा उत्कृष्ट प्रदर्शन गरिरहेको छ । पुलिसलाई पराजित गरेसँगै टोलीको मनोबल उच्च भएको छ । यस खेलका लागि एनआरटीका पूर्व खेलाडी लक्ष्मण रुचाल टोलीमा रहने छैनन् । संकटाका लागि रुचालले निकै राम्रो प्रदर्शन गर्दै आइरहेका छन् । एनआरटीलाई पराजित गरेमा संकटा मनाङसँग अंक बराबरी गर्नेछ ।

आजको खेलहरु :

मंसिर २२ : हिमालयन शेर्पा विरुद्ध पुलिस – ११:०० – हल्चोक

मंसिर २२ : संकटा विरुद्ध एनआरटी – २:३० – हल्चोक