लमजुङ (हाम्रो खेलकुद) – जिल्लाकै सर्वाधिक धनराशीको त्रिवेणी कपको २७औं संस्करण पुस दोस्रो साताबाट आयोजना हुने भएको छ ।

आयोजक त्रिवेणी युवा क्लबले पत्रकार सम्मेलनको आयोजना गर्दै २७औं संस्करणका त्रिवेणी कप पुस १२ गतेबाट सदरमुकाम बेसीसहरस्थित सहजी खेल मैदानमा हुने जानकारी गराएको हो ।

जिल्लाको कुना काप्चामा सिमित प्रतिभालाई पहिचान गरी राष्ट्रिय स्तरमा पु¥याउने उद्देश्यले प्रतियोगिता निरन्तर आयोजना गरिरहेको आयोजक त्रिवेणी युवा क्लबका अध्यक्ष सिजन श्रेष्ठले जानकारी गराए ।

त्रिवेणी कपमा लमजुङ, मनाङ, गोरखा, तनहुँ, चितवन, कास्की, काठमाडौंलगायतका जिल्लाका टिमहरु गरी गरी २५ टिमको सहभागिता रहने आयोजकले अपेक्षा गरेको छ ।

२०४९ सालमा क्लब गठन भएसँगै क्लबले खेतबाट १ खसी र ३ हजार पुरस्कार राशिबाट सुरु भएको प्रतियोगिता अहिले जिल्लाकै सबैभन्दा ठुलो प्रतियोगिता बनेको हो ।

प्रतियोगिताको विजेताले ३ लाख रुपैया पाउनेछन् । दोस्रो हुनेले १ लाख ५० हजार तथा सेमिफाइनलमा पराजित हुने दुई टिमले समान ५० हजार पाउने आयोजकले जनाएको छ ।

प्रतियोगिताको सर्वाधिक गोलकर्ता र सर्वोत्कृष्ट खेलाडीलाई नगद १५–१५ हजार पाउने छ । यस्तै सेमिफाइनल र फाइनल खेलको म्यान अफ दि म्याचले ७ हजार ५ सय प्राप्त गर्ने क्लबले जनाएको छ ।

प्रतियोगिता सञ्चालन गर्न करिव १९ लाख ७५ हजार रुपैयाँ खर्च हुने आयोजकले जनाएको छ ।