धनगढी (हाम्रो खेलकुद) – नवोबुद्ध युगा क्लब धनगढीले फारवेष्ट पशुपति कप फुटबल प्रतियोगितामा विजयी सुरुवात गरेको छ । धनगढी रंगशालमा आइतबार भएको खेलमा गौरीगंगा नगरपालिकाको मसुरिया फुटबल एकेडेमीलाई २–१ ले हराउँदै विजयी सुरुवात गरेको हो ।

निर्धारित समयमा १–१ को बराबरी भएपछि थप समयमा नवोबुद्धले गोल थप्दै नतिजा आफ्नो पक्षमा पारेको थियो । थप समयको १० औं मिनेटमा सुरज महतोले गोल गरेपछि त्यसमै नवोबुद्ध विजयी भएको थियो ।

दीपेश रुम्बो गोलबाट खेलको दोस्रो मिनेटमा मसुरियाले खेलमा अग्रता लिएको थियो । तर, त्यो अग्रता लामो समय टिक्न सकेन । पदक नेपालीले आठौं मिनेटमा नवोबुद्धका लागि बराबरी गोल गरे । सुरज खेलेको म्यान अफ दी म्याच घोषित भएका थिए ।

फारवेष्ट पशुपति युवा क्लबले आयोजना गरेको प्रतियोगितामा सोमबार तीन वटा खेल हुनेछन् । पहिलो खेलमा नवदुर्गा युवा क्लब धनगढी र घोडाघोडी युवा क्लब सुख्खड, दोस्रो खेलमा मनकामना युवा क्लब जुगेडा र वनदेवी युवा क्लब तेघरीबीच हुनेछ ।

त्यस्तै अर्को खेल गौरीगंगा–११ स्पोर्टस क्लब र सुदुरपश्चिमाञ्चल फुटबल एकेडेमी पुर्नवास बीच हुने आयोजक क्लबका बरिष्ठ उपाध्यक्ष हरि बोहोराले जानकारी दिए ।

पुस १४ गते सम्म चल्ने प्रतियोगिताको विजेताले ४ लाख र दोस्रो हुने टोलीले २ लाख रुपैयाँ पाउनेछ । प्रतियोगितामा १६ टोलीको सहभागिता रहेको छ । नेकपाका सुदुरपश्चिम अध्यक्ष कर्ण थापाले प्रतियोगिताको उद्घाटन गरेका थिए ।