काठमाडौं (हाम्रो खेलकुद) – नेपाली फुटबलको पुरानो र सबैभन्दा चर्चित मध्येको रानीपोखरी कर्नर टिम (आरसिटी) सहिद स्मारक ‘बी’ डिभिजन लिग च्याम्पियन बनेको छ ।

मंगलबार भएको सुपर लिगको अन्तिम खेलमा आरसिटीले श्री भगवती युवा क्लबलाई १–० ले पराजित गर्दै उपाधि चुमेको हो । तर, रेलिगेसन विनाको लिग भएका कारण आरसिटीले च्याम्पियन भएर पनि ‘ए’ डिभिजनमा उक्लन सकेन । सुपर लिगमा आरसिटी अपराजित रहँदै ३ खेलबाट ९ अंक जोडेर च्याम्पियन बन्यो । दोस्रो भएको श्री भगवतीले १ हार बेहोर्दै ६ अंक जोड्यो ।

सातदोबाटोस्थित एन्फा कम्प्लेक्समा आरसीटीलाई जित दिलाउन पहिलो हाफमा लोकेन्द्र बहादुर कार्कीले गरेको गोल नै निर्णायक बन्यो । लोकेन्द्रले खेलको २५औं मिनेटमा हेडमार्फत गोल गरेका थिए ।

टुसाल युथ क्लबले सातदोबाटो युथ क्लबलाई २–१ ले पराजित गर्दै टुसाल तेस्रो स्थान हात पार्यो । टुसालका साजन सुनुवार राईले गोल गरे । दुवै टोलीले एक–एक गोल उपहार पाएको थियो । टुसालका प्रकाश भुजेलले आत्मघाती गोल गर्दा सातदोबाटोका भोजराज मगरले पनि आत्मघाती गोल गरेका थिए । टुसालले सुपर लिगमा ३ अंक जोड्यो । सातदोबाटोले अंक जोड्न सकेनन् ।

उपाधिसँगै आरसीटीले ८ लाख रूपैयाँ हात पार्यो । उपविजेता बनेको श्री भगवतीले ५ लाख रुपैया पायो । टुसालले ३ लाख र सातदोबाटोले २ लाख रुपैया हात पार्यो । विजयी टिम तथा खेलाडीलाई एन्फाका अध्यक्ष कर्माछिरिङ शेर्पा लगायतले पुरस्कृत गरे ।