हेटौंडा (हाम्रो खेलकुद) – यसै साताबाट सुरु हुने दोस्रो भूगर्भ सिमेन्ट सहिद स्मृति राष्ट्रिय फुटबल प्रतियोगिता–२०७५ मा दश टोली सहभागी हुने भएको छ ।

प्रतियोगितामा आयोजक, एक विदेशी र आठवटा नेपालका चर्चित ‘ए’ डिभिजन क्लबको सहभागिता रहने भएको हो । प्रतियोगितामा आयोजक, दाफिन्स र थ्रीस्टार, आर्मी, सशस्त्र प्रहरी, नेपाल प्रहरी, मच्छिन्द्र, हिमालयन शेर्पा, सरस्वती र च्यासल युथ क्लब सहभागी हुने भएको हो ।

चैत ७ गतेबाट १६ गतेसम्म हेटौंडा–१० स्थित वनविज्ञान मैदानमा हुने प्रतियोगिताको खेल तालिका समेत आयोजक मकवानपुर जिल्ला फुटबल संघले सार्वजनिक गरेको छ । प्रतियोगिताको उद्घाटन खेल आयोजक र मच्छिन्द्र क्लबबीच हुने आयोजकले सोमबार हेटौंडामा पत्रकार सम्मेलन गरेर जानकारी दिएको छ ।

प्रतियोगिताका विजेताले ८ लाख रुपौया हात पार्नेछन् । उपविजेताले ४ लाख रुपैया हात पार्ने आयोजकले जनाएको छ । प्रतियोगितामा सर्वोत्कृष्ट खेलाडीलाई ७५ हजार रुपियाँ र विधागत उत्कृष्ट खेलाडी तथा प्रशिक्षकलाई जनही २०-२० हजार रुपियाँको व्यवस्था गरिएको आयोजक समितिका अध्यक्ष टीकाराम लामाले जानकारी दिए । प्रतियोगितामा करिब ८५ लाख खर्च अनुमान गरिएको छ ।

प्रतियोगिता संयोजक प्रताप विष्टका अनुसार प्रतियोगिताका लागि भूगर्भ सिमेन्टले मुख्य प्रायोजन गरेको छ । हेटौंडा उपमहानगरपालिकाले प्रतियोगिताका लागि आठलाख रुपैयाँ सहयोग गरेको पत्रकार सम्मेलनमा बताइएको छ ।

प्रतियोगिताका लागि मकवानपुरका स्थानीय निकाय थाहानगरपालिकासहित आठवटा गाउँपालिकाले समेत नगद सहयोग उपलब्ध गराएका छन् । २०६४ सालमा आयोजना गरिएको शहीद स्मृति राष्ट्रिय खेलकुद प्रतियोगितालाई निरन्तरता दिनका लागि यसवर्षबाट प्रतियोगितालाई अगाडि बढाइएको हो । उक्त समयमा थ्रीस्टार क्लबले उपाधि जितेको थियो ।

हेटौंडामा प्रत्येक वर्ष आयोजना भइरहेको सुमन भोम्जन स्मृति हेटौंडा गोल्डकप प्रतियोगिता यसवर्ष प्राविधिक कारण नहुने भएसँगै फुटबल संघले यस प्रतियोगिता गरेको हो ।

प्रतियोगिताका लागि मैदानको स्तरोन्नति र अस्थायी प्याराफिट बनाउने काम भइरहेको संयोजक विष्टले जानकारी दिए । उनका अनुसार फलाम र बाँसको प्याराफिटमा बसेर दैनिक पाँचहजार जनाले खेलको अवलोकन गर्न सक्नेछ । ‘प्रतियोगिताको तयारी लगभग सकिएको छ । अब प्रतियोगितामा सहभागी हुन आउने टोलीको स्वागत गर्न मात्रै बाँकी रहेको छ ।

हामीले प्रतियोगितालाई भव्यरुपमा सञ्चालन गर्नका लागि विभिन्न उपसमिति समेत बनाएर अगाडि बढिरहेका छौं ।’, उनले भने ।