धनगढी (हाम्रो खेलकुद) – कैलालीको गोदावरी नगरपालिका वडा न २ स्थित वनदेवि युवा क्लवको आयोजनामा वैशाख ६ गतेदेखि १५ गतेसम्म प्रथम बी वाइ सी मेयर कप २०७६ हुने भएको छ ।

आयोजक बनदेबी युबा क्लब तघरीले बिहिबार पत्रकार सम्मेलनको आयोजना गर्दै प्रतियोगिताको बारेमा जानकारी दिएको छ । गोदावरी नगरपालिकाको सहयोगमा २० लाख १५ हजार रकम बराबरको प्रतियोगिता हुने आयोजकले पत्रकार सम्मेलनमा जानकारी दिएको छ । प्रतियोगिताको विजेता टिमले नगद ३ लाख १ रुपैयाँ र उपविजेताले १ लाख ५० हजार १ रुपैयाँ पाउनेछन् ।

प्रतियोगितामा उत्कृष्ट हुने खेलाडिले १५ हजार प्राप्त गर्नेछन् भने प्रतियोगिताको उत्कृष्ट गोल किपर , डिफेन्डर, स्टईकर, सर्वाधिक गोलकर्ता र उदयमान खेलाडिलाई जनहि १०–१० हजार पुरस्कार प्रदान गरिनेछ । साथै प्रतियोगिताका प्रत्येक खेलका म्यान अफ द म्याचलाई जनहि ३ हजार रुपैया प्रदान गरिने आयोजक क्लबका उपाध्यक्ष प्रकाश शाहीले जानकारी दिए ।

गोदावरी नगरपालिकालाई फुटवलको शहरको रुपमा देशव्यापि परिचित गराउने , युवाहरुलाई खेलतर्फ उत्प्रेरित गराउने र राष्ट्रिय तथा अन्र्तराष्ट्रिय खेलाडि उत्पादन गर्ने उद्येश्य सहित प्रतियोगिता हुन लागेको शाहीले बताए । प्रत्येक सहभागि हुने टिमहरुले आफ्नै पालिकाभित्रका अनिवार्य रुपमा ८ जना खेलाडि र ३ जना पालिका बाहिर वा विदेशि खेलाडि राख्न पाउने व्यवस्था गरीएको छ ।