नुवाकोट (हाम्रो खेलकुद) – नेपाल पुलिस क्लब दोस्रो नुवाकोट गोल्डकप फुटबल प्रतियोगिताको सेमिफाइनलमा प्रवेश गरेको छ । आइतबार भएको तेस्रो क्वाटरफाइनल खेलमा अर्को विभागिय टोली एपीएफलाई ३–२ ले पराजित गर्दै पुलिस उपाधिनजिक पुगेको हो ।

बट्टारमा भएको खेलमा पुलिसले एक गोलले पछाडी परेको अवस्थामा खेल उल्टाउँदै जित दर्ता गर्यो । पहिलो हाफको ४० औं मिनेटमा नवीन लामाले पेनाल्टीमार्फत गोल गर्दै एपीएफलाई अग्रता दिलाए । पुलिसका गोलरक्षक रोशन खड्काले विपक्षी खेलाडीलाई डिबक्समा खुट्टा तानेपछि एपीएफले पेनाल्टी पाएको थियो ।

पुलिसका लागि ५० औं मिनेटमा अजित भण्डारीले गोल गर्दै खेल बराबरीमा ल्याएका थिए । त्यसको एक मिनेट बित्न नपाउँदै पुन: पुलिसले काउन्टर अट्याकमा गोल गर्दै २–१ को अग्रता बनायो । ७० औं मिनेटमा रवी पासवानले गोल गर्दै पुलिसलाई ३–१ ले अगाडी बढाए । ७८ औं मिनेटमा एपीएफका आशिष लामाले गोल गरेर दुरी छुट्टाएपनि खेलको नतिजा बदल्न उक्त गोल पर्याप्त भएन ।

खेलमा उत्कृष्ट प्रर्दशन गरेका पुलिसका रवी पासवान म्यान अफ दी म्याच घोषित भए । उनले १० हजार रुपैयाँ हात पारे । सेमिफाइनल पुगेको पुलिसले फाइनल प्रवेशको लागि मंगलबार घरेलु टोली नुवाकोट ११ सँग प्रतिस्पर्धा गर्नेछ ।

नुवाकोट जिल्ला खेलकुद विकास समिति र नुवाकोट फुटवल संघले आयोजना गरेको प्रतियोगितामा १० टिमले सहभागिता जनाएका छन । प्रतियोगिाको विजेताले ६ लाख रुपैयाँ र उपविजेताले ३ लाख रुपैयाँ हात पार्नेछ । प्रतियोगिता आगामी जेठ ३१ गतेसम्म संचालन हुनेछ । प्रतियोगिता अन्तर्गत सोमबार चौथो क्वाटरफाइनलमा मनाङ मर्स्याङ्दी र च्यासल युथ क्लबबीच प्रतिस्पर्धा हुनेछ ।