काठमाडौं (हाम्रो खेलकुद) – राजधानीमा जारी दक्षिण एसियाली फुटबल फेडेरेसन (साफ) यू-१८ च्याम्पियनसिपका उपाधिका लागि भारत र बंगलादेश भिड्ने भएका छन् ।

शुक्रबार सम्पन्न सेमिफाइनल खेलमा दुवै टोलीले ४-० को जित दर्ता गर्दै उपाधि भिडन्त तय गरेका हुन् । भारतले माल्दिभ्सलाई पराजित गर्दा बंगलादेशले भुटानको चुनौती पन्छाएको थियो । अब आइतबार हुने फाइनलमा समूह बी बाट नै आएका दुई टोलीले खेल्नेछन् । समूह चरणमा यी दुईको खेल गोलरहित बराबरीमा टुंगिएको थियो ।

शुक्रबार भारतले खेलको सातौं मिनेटमा अग्रता लिएको थियो । लामो थ्रोमा आएको पासलाई सिनियर राष्ट्रिय टोलीबाट समेत खेलिसकेका नरेन्द्र गहलटले फ्लिक हेडरमार्फत गोलमा परिणत गरेका थिए । पहिलो हाफको इन्ज्युरी समयमा कर्नरमा आएको बल माल्दिभ्सको डिफेन्डरलाई लाग्दै गोलमा परिणत भएपछि भारतले अग्रता दोब्बर पारेको थियो ।

खेलको ७९ औं मिनेटमा भारतले ३-० को अग्रता लियो । कर्नरमा आएको बललाई माल्दिभ्सका गोलरक्षक हसन अलीफले फुस्काएपछि मनवीर सिंहले सहजै गोल गरे । त्यसको ३ मिनेटमै भारतले अग्रता बढायो । मीतेइ निन्थोइङबाले कर्नरमा आएको रिबाउन्डलाई पेनाल्टी क्षेत्रबाहिरबाट शक्तिशाली भलीमा गोल गरेका थिए ।

त्यसअघि पहिलो सेमिफाइनलमा बंगलादेशले भुटानलाई ४-० ले नै पराजित गरेको थियो । पहिलो हाफमा ३ गोल गरेको बंगलादेशले दोस्रो हाफको इन्ज्युरी समयमा गोल थप्दै सहज जित दर्ता गरेको थियो । आइतबार भुटान र माल्दिभ्सले तेस्रो स्थानका लागि प्रतिस्पर्धा गर्दा भारत र बंगलादेशबीच उपाधिका लागि भिडन्त हुनेछ ।