एजेन्सी – इंग्लिस प्रिमियर लिग फुटबलमा लन्डन क्लब चेल्सीले संघर्षपुर्ण जित निकाल्दा टोटेनहम बराबरीमा रोकिएको छ । घरेलु मैदान स्टामफोर्ड ब्रिजमा चेल्सीले न्यू क्यासल युनाइटेडमाथि १–० को संघर्षपुर्ण जित निकालेको हो ।

मार्काेस अलन्सोले दोस्रो हाफमा गरेको गोल नै चेल्सीको जितमा पर्याप्त बन्यो । पाहुना टोलीलाई लगातार दवावमार राखेपनि चेल्सीले न्यू क्यासलको बलियो रक्षापङ्ति तोड्न निक्कै हम्मे परेको थियो । पहिलो हाफमा चेल्सीको तीन सुन्दर प्रहार गोलरक्षक मार्टिन डुभ्राकाले बचाएका थिए । ५६औं मिनेटमा विलियनको कर्नरमा टम्मी अब्राहमको प्रहार बारमा लाग्दा चेल्सी अग्रता लिनबाट चुकेको थियो ।

६८औं मिनेटमा डुभ्राकाले क्रिस्टियन पुलिसिसको प्रहार मुस्किलले बचाउदा चेल्सी चुकचुकाएको थियो । लगातार निराश भइरहेको चेल्सीका लागि अलन्सोले ७३औं मिनेटमा गोल गर्दै अग्रता दिलाए । उनले कलुम हड्सन ओडोईको पासमा गोल गरेका थिए ।

८०औं मिनेटमा अब्राहमको प्रहारलाई डिफेन्डर यडिन डि एन्ड्रीले ब्लक गरिदिए । ८२औं मिनेटमा न्यू क्यासलले बराबरीको मौका खेर फाल्यो । एलन सेन्ट म्याक्सीमिनको पासमा जेट्रो विलेम्सको प्रहार बारबाट थोरै बाहिरियो । त्यसपछि थप गोल निस्कन नसक्दा चेल्सी १–० ले विजयी हुन सफल भयो । जितसँगै चेल्सीले ९ खेलबाट १७ अंक जोडेको छ । पराजित न्यू क्यासल ८ अंकसहति १८औं स्थानमा छ ।

यता, टोटेनहम वाट्फोर्डसँगको सम्भावित हारबाट जोगिएको छ । खेल सकिन तीन मिनेट बाँकी रहँदा डेल अलीले गोल गर्दै टोटेनहमलाई हारबाट जोगाए ।  त्यसअघि खेलको छैटौ मिनेटमा नै अब्दुलाय डोउकोउरेको गोलबाट घरेलु टोली पछि परेको थियो ।

टोटेनहम स्टेडियममा घरेलु टोलीले वाट्फोर्डलाई लगातार दवावमा राखेपनि गोलको लागि निकै संघर्ष गर्नुपरेको थियो । बराबरीपछि टोटेनहम ९ खेलबाट १२ अंक जोडेर सातौ स्थानमा छ । वाट्फोर्ड ४ अंक जोडेर पुछारमा छ ।

प्रिमियर लिगका अन्य खेलका नतिजा
एभर्टनविरुद्ध वेस्टह्याम युनाइटेड (२–१)
एस्टन भिल्लाविरुद्ध ब्राइटन (२–१)
बर्नमाउथविरुद्ध नर्विच सिटी (०–०)
लेस्टर सिटीविरुद्ध बर्नली (२–१)
वल्भ्सविरुद्ध साउथह्याम्पटन (१–१)